Aıda Balaeva Almaty oblysynyń turǵyndarymen kezdesti

NUR-SULTAN. QazAqparat – Taldyqorǵan qalasynda QR Prezıdentiniń kómekshisi — QR Prezıdenti Ákimshiliginiń Ótinishterdi qaraýdy baqylaý bóliminiń meńgerýshisi Aıda Balaeva kóshpeli qabyldaý ótkizdi. Bul týraly QazAqparat QR Prezıdenti Ákimshiligi qoǵamdyq qabyldaýynyń Telegram-kanalyna silteme jasap.

«Nur Otan» partııasynyń Almaty oblystyq fılıalyna qabyldaýǵa kelgen 106 turǵynnyń jartysyna jýyǵy baspana máselesimen kelgen. Kópbalaly otbasylar, jalǵyzbasty analar, múgedek balasy bar áskerılerdiń jeńildikpen baspana alý týraly ótinimderi, ıpotekalyq jáne arendaldyq máseleler qaralǵan.

Odan bólek, turǵyndar ınfraqurylymdyq máselelerdiń de ózekti bolyp otyrǵanyn jetkizdi. Máselen, respýblıkalyq mańyzy bar Almaty-Qapshaǵaı jolyna aqy tóleýden qashqan júrgizýshiler oblystyq joldarǵa shyǵyp, keptelisti kóbeıtken. Kólik aǵynyn azaıtý úshin turǵyndar qosymsha kópir salýdy ótindi.

Alakól aýdany Toqjaılaý kentiniń turǵyny Qabanbaı-Kóktuma jolynyń 44-96 shaqyrym aralyǵynda jóndi joldyń joqtyǵyn aıtty. Saldarynan týrıster azaıyp, óńirdegi shaǵyn jáne orta bıznes tabys kózinen aıyrylyp otyr.

Sonymen birge, Aıda Balaeva Talǵar qalasynyń bilim berý mekemelerine erekshe kóńil bólýdi tapsyrdy. Talǵar turǵynynyń aıtýynsha, úsh jyl buryn berilýi tıis boǵan 1200 oryndyq mektep áli kúnge deıin salynyp bitpegen.

Kóksý aýylynyń turǵyndary apatty jaǵdaıda turǵan sý qoımasyn jóndeýge kómek kórsetýdi surady. Odan aýyl turǵyndaryna ǵana emes, 1900 gektar egindi alqapqa da qaýip tónip tur.

Osy jáne ózge de máseleler boıynsha Aıda Balaeva Almaty oblysynyń ákimdigine tapsyrmalar berdi. Olardyń oryndalýyn QR Prezıdenti Ákimshiligi qatań baqylaýǵa aldy.

Respýblıkalyq mańyzy bar máseleler Aıda Balaevanyń tóraǵalyǵymen jáne ortalyq memorgan ókilderiniń qatysýymen arnaıy otyrysta qaralatyn bolady.