Aıda Balaeva «Álııa» fılminiń túsirilimi toqtatylýy múmkin ekenin aıtty

<p>ASTANA. KAZINFORM&mdash; QR Mádenıet jáne aqparat mınıstri Aıda Balaeva Facebook jelisinde aty ańyzǵa aınalǵan mergen Álııa Moldaǵulovaǵa arnalǵan &laquo;Álııa&raquo; kórkem fılminiń túsirilimin toqtatýǵa qatysty pikir bildirdi.</p>

Balaeva aldymen Álııa Moldaǵulovanyń erligi tarıhymyzdyń ajyramas bóligi ekenin, onyń erligine arnalǵan fılmniń úlken ekrandarǵa shyǵýyna mınıstrlik múddeli ekenin atap ótti.

– «Álııa» fılmi biz úshin basty fılmderdiń biri bolmaq. Bul jalpy bıýdjeti 900 mln teńgeden asatyn aýqymdy joba, onyń 450 mln teńgesi jeke ınvestıtsııa, al qalǵan somany kınokompanııa memlekettik bıýdjetten alýdy josparlaǵan», - dep jazdy ol postta. — Osy jyldyń maýsym aıynda fılm túsirýdi josparlap otyrǵan ujym Ulttyq kınematografııany qoldaý memlekettik ortalyǵy uıymdastyrǵan pıtchıng sharasyna qatysyp, memlekettik qoldaýǵa ótinish bildirip, fılmniń stsenarııin tanystyrdy. Vedomstvoaralyq komıssııa otyrysynyń qorytyndysy boıynsha 18 joba, onyń ishinde «Álııa» fılmi qarjylandyrýǵa usynyldy.

Mádenıet mınıstriniń aıtýynsha, kınokompanııa memleket qarjysyn ysyrap etpeý úshin baıqaýǵa qatysýdy ýaqytsha toqtatý týraly sheshim qabyldaǵan.

– Bul sheshimdi qabyldaý úshin jobany iske asyrýdy keshiktirýge týra keldi, óıtkeni túsirilimniń negizgi bóligi Belarýs Respýblıkasynyń aýmaǵynda josparlanǵan bolatyn, onda soǵys qımyldarynyń kórinisterin túsirý josparlanǵan, - dep túsindirdi A.Balaeva. – Belarýs qazirgi ýaqytta basqa jobalardyń, negizinen reseılik jobalardyń joǵary júktemesine baılanysty qajetti tabıǵı alańdardy usyna almaı otyr. Sol sebepti tabıǵı dekoratsııalardy qoldaný kestesin kelisý múmkin bolmady, sodan keıin merzimdi buzý jáne jobany ýaqytyly aıaqtamaý qaýpi týyndady. Osyǵan baılanysty Shyǵys Qazaqstan oblysyndaǵy tabıǵı alańdardy qoldaný týraly sheshim qabyldandy. Bul túsirilim sapasyn saqtap qana qoımaı, ýaqytynda berilýin qamtamasyz etedi.

Balaeva jobany qarjylandyrýda esh qıyndyq joq, ujym fılmniń túsirilimin ýaqytynda aıaqtap, úlken ekrandarǵa usynýǵa bar kúsh-jigerin salatynyna sendirdi.

– Qazaqstan Respýblıkasynyń Mádenıet jáne aqparat mınıstrligi «Álııa» jobasyna jáne ulttyq murany saqtaýǵa baǵyttalǵan basqa da bastamalarǵa barlyq qajetti qoldaý kórsetýdi jalǵastyrady. «Álııa Moldaǵulova týraly fılm elimizdiń mádenı ómirindegi mańyzdy oqıǵaǵa aınalyp, keıipkerimizdiń erligin laıyqty túrde máńgilikke qaldyratynyna senimdimin», - dep jazdy mınıstr.