Ahmetjanov: Bilim berý júıesindegi jemqorlyq memlekettiń bolashaǵyna tikeleı qaýip tóndiredi

ALMATY. QazAqparat - QR Sybaılas jemqorlyqqa qarsy is-qımyl agenttiginiń tóraǵasy Marat Ahmetjanov elimizdiń joǵary oqý oryndary rektorlarynyń qatysýymen ótken Respýblıkalyq keńeste sybaılas jemqorlyq shemalaryna qarsy pármendi sharalar qoldaný jáne para alý jaǵdaılaryn azaıtý týraly aıtty, dep habarlaıdy QazAqparat tilshisi.

Marat Ahmetjanov sybaılas jemqorlyqqa qarsy komplaens qyzmetter ınstıtýtyn engizý – osyndaı sharalardyń biri retinde jemqorlyq táýekelderin anyqtaýǵa, múddeler qaqtyǵysyn sheshýge jáne jemqorlyqqa qarsy standarttarǵa sáıkestikti qamtamasyz etýge yqpal etetinin atap ótti.

Sondaı-aq, vedomstvo basshysy joǵary oqý oryndarynyń komplaens qyzmetteriniń resmı jumysyn synǵa aldy.

Onyń aıtýynsha, elimizdiń 68 joǵary oqý ornynda mundaı qyzmetter qurylmaǵan.

Komplaens-qyzmetterdi damytý – jemqorlyqqa qarsy mádenıetti qalyptastyrýdyń mańyzdy bóligi. Osyǵan oraı, Marat Ahmetjanov barlyq rektorlardy atalǵan jemqorlyqqa qarsy ınstıtýtty qurýǵa, standarttardy bekitýge, sondaı-aq stýdentterdi sybaılas jemqorlyqqa qarsy oqytýǵa nazar aýdarýǵa shaqyrdy.

Aıta ketý kerek, Memleket basshysynyń tapsyrmasy aıasynda «Sybaılas jemqorlyqqa qarsy mádenıet negizderi» elektıvti páni kóptegen joǵary oqý oryndarynyń pánder tizimine engizilgen bolatyn. Alaıda, Sybaılas jemqorlyqqa qarsy qyzmet basshysynyń pikirinshe, ony mindetti pánder tizimine engizgen kezde ǵana oqytýdyń naqty áseri bolýy múmkin.

Sonymen qatar, ol bilim berý júıesindegi jemqorlyq memlekettiń bolashaǵyna tikeleı qaýip tóndiretinin tilge tıek etti.

Spıker sybaılas jemqorlyqtyń aldyn alý úshin quraldar bar ekenin, tek olardy paıdalana bilý qajettigin atap ótti.

«Sondyqtan bizdiń ortaq mindetimiz – ony azaıtý jáne joıýǵa qajetti barlyq sharalardy qabyldaý. Joǵary oqý oryndarynda adal eńbekti baǵalaıtyn, óz Otanyna qamqor bolatyn elimizdiń laıyqty azamattaryn tárbıeleý jáne oqytý», - dedi ol.