Ahmet Baıtursynulynyń 150 jyldyǵyna oraı ǵylymı konferentsııa ótti
Konferentsııada sóz alǵan Ázerbaıjan Respýblıkasynyń Bilim mınıstri Emın Amrýllaev: «Qazaq halqynyń qoǵamdyq jáne mádenı oıanýyna qyzmet etken kórnekti qoǵam qaıratkeri, aǵartýshy jáne lıngvıst A. Baıtursynulynyń qyzmeti túrki áleminiń baı murasynyń jarqyn úlgisi»,- dedi.
QR Ǵylym jáne joǵary bilim mınıstri S.Nurbek óziniń quttyqtaý sózinde: «Til biliminiń, ádebıettanýdyń jáne oqytý ádistemesiniń bastapqy mazmuny Ahmet Baıtursynulynyń eńbekterinde. Onyń sol eńbekterdegi ǵylymı tujyrymdary men qorytyndylary áli kúnge deıin oqytý úderisinde de, ǵylymı baǵytta da keńinen qoldanylýda. Qazirgi kezde álipbı túzýde, termınjasamda nemese til úıretý úderisinde biz onyń eńbekterine soqpaı kete almaımyz. Óıtkeni ol negizderdiń negizin jasaǵan asa kórnekti oqymysty, aǵartýshy ǵalym», - dep atap ótti.
Qyrǵyz Respýblıkasynyń Bilim jáne ǵylym mınıstri Almazbek Beıshenalıev óz sózinde: «A. Baıtursynulynyń mereıtoıy bizge tarıh aldyndaǵy asyl jaýapkershiligimizdi, halyqqa qyzmet etýdiń qasıetti dástúrin eske salady», - dedi.
Konferentsııada otandyq jáne sheteldik túrkitanýshy, ahmettanýshy ǵalymdar, atap aıtqanda, L.N. Gýmılev atyndaǵy Eýrazııa ulttyq ýnıversıtetiniń rektory E. Sydyqov, Nazarbaev Ýnıversıtetiniń vıtse-prezıdenti Q. Daırova, Ázerbaıjan Respýblıkasy Ulttyq Ǵylym akademııasy Nasımı atyndaǵy Til bilimi ınstıtýty Túrik tili bóliminiń meńgerýshisi, fılologııa ǵylymynyń doktory Elchın Ibrahımov, Túrik Respýblıkasy Pamýkkale ýnıversıtetiniń professory, doktor Nergız Bıraı, akademık Sh.Qurmanbaıuly, Túrkitaný jáne altaıtaný ǵylymı-zertteý ınstıtýtynyń dırektory Q.Sartqojauly, L.N. Gýmılev atyndaǵy Eýrazııa ulttyq ýnıversıtetiniń professory B.Ábdýálıuly, L.N. Gýmılev atyndaǵy Eýrazııa ýnıversıtetiniń dotsenti Q.Kemeńger baıandama jasap, ult ustazy, uly reformator, Alash qozǵalysy qaıratkeriniń ǵalymdyq qyzmetine jáne ǵylymı eńbekterine jan-jaqty toqtaldy.
Konferentsııa aıasynda Halyqaralyq túrki akademııasynyń ázirlegen «Túrkistan – túrk eli entsıklopedııasy», «Túrki áleminiń tuǵyrly tulǵalary», «Ahmet Baıtursynuly jáne Alash» kitaptarynyń tusaýkeseri ótkizildi.
Ǵylymı konferentsııa Halyqaralyq Túrki akademııasy Ǵylymı keńesiniń músheleri – bilim jáne ǵylym salalary mınıstrleriniń otyrysy aıasynda ótti.