AHQO jańa býynnyń qarjy ortalyǵy retinde qurylýda - Saǵyntaev
"Sizderdi elimizdiń kindik qalasy - búginde óziniń 20 jyldyǵyn atap ótip jatqan arý Astanada qarsy alyp otyrǵanyma shyn júrekten qýanyshtymyn. Elbasymyz Nursultan Ábishuly Nazarbaev aıtqandaı: «Astana - búkil Qazaqstannyń jetistigi. Biz HHІ ǵasyrda ǵalamat dúnıeni birge jasadyq. Adamzat tarıhynda mundaı qalalar eshqashan 20 jyldyń ishinde salynbaǵan. Al biz - saldyq! Jas elorda egemen Qazaqstannyń qalyptasýyn, bizdiń jeńisterimiz ben jetistikterimizdi, álemniń damyǵan ekonomıkasynyń TOP-30-dyǵyna kirýge umtylǵan elimizdiń bolashaǵyn bir arnaǵa toǵystyrdy. Kúni erteń erekshe oqıǵa - bolashaq qarjy naryqtaryna serpin berýge baǵyttalǵan, táýelsizdik jyldaryndaǵy eń iri ulttyq megajoba - Astana halyqaralyq qarjy ortalyǵynyń resmı tusaýkeseri ótedi", - dep atap ótti sessııa otyrysyn ashqan Úkimet basshysy.
Sonymen qatar ol búgingi dıalog jáne mártebeli meımandarmen kezdesý asa mańyzdy ekendigin, sebebi AHQO alǵashqy qadamyn endi basyp jatqanyn atap ótti.
"Bizdiń áńgimemiz, sizderdiń keńesterińiz ben usynystaryńyz Qarjy ortalyǵynyń jumysyn durys úılestirip, onyń múmkindikteri men artyqshylyqtaryn pash etýge septigin tıgizetinine senimdimin. AHQO jańa býynnyń qarjy ortalyǵy retinde qurylýda. Ol álemdik qarjy ortalyqtarynyń klassıkalyq fýnktsııalaryn oryndap qana qoımaı, sonymen qatar dúnıejúzilik qarjy áleminiń eń perspektıvaly damý baǵyttaryndaǵy qyzmetterdi kórsetetin bolady", - dedi Baqytjan Saǵyntaev.