AHQO sıngapýrlyq mamandarmen birlesip qarjy salasyndaǵy ınnovatsııalardy damytady

ASTANA. QazAqparat - Sıngapýrdyń aqsha-qarjy basqarmasy, AHQO qarjy qyzmetterin retteý jónindegi komıteti jáne «Astana» halyqaralyq qarjy ortalyǵynyń Ákimshiligi Sıngapýr men Qazaqstan arasynda FınTeh salasynda yntymaqtastyqty damytý jóninde úshjaqty kelisimge qol qoıdy, dep habarlaıdy QazAqparat.

Bul kelisim AFSA, AHQO jáne MAS taraptarynyń FınTeh salasyndaǵy ınnovatsııalyq jobalarǵa qatysyp, óz qyzmetteriniń aıasynda ınnovatsııalyq jobalardy damytýǵa múmkindik týǵyzady. Kelisimge AFSA bas dırektor qyzmetin atqarýshy Muhtar Bóbeev, «Astana» halyqaralyq qarjy ortalyǵy ákimshiligi» AQ basqarma tóraǵasy Nurlan Qusaıynov jáne MAS FınTeh boıynsha basqarýshy dırektory Sopnendý Mohantı qol qoıdy.

«FınTeh - AHQO-nyń negizgi salalarynyń biri. Osyǵan oraı, kelisimshartqa qol qoıa otyryp, biz osy salada halyqaralyq yntymaqtastyqtyń keńeıgenin qoldaımyz. Bul kelisim eki el zań júıesiniń FınTeh salasyndaǵy jalpyǵa ortaq ınnovatsııalar jóninde aqparat almasýyn nyǵaıtady», - dedi N. Qusaıynov myrza.

«MAS-pen osy kelisimge qol qoıǵanymyzǵa rızamyz. Bul yntymaqtastyqty keńeıtip, FınTeh qyzmeti salasynda ınnovatsııalardyń damýyna óz úlesin qosady. Bizdiń oıymyzsha, kelisim eki eldiń ınnovatsııalyq kompanııalaryna jańa múmkindikterge jetýge jol ashady», - dedi Bóbeev myrza.

 «Kelisim Sıngapýr men Qazaqstan arasyndaǵy FınTeh yntymaqtastyǵynyń ekojúıesin damytady. Bul kelisim eki eldiń FınTeh salasynda qyzmet atqaratyn kompanııalarynyń yntymaqtasýyna, birigip jańa múmkindikterdi paıdalanýyna jáne jalpy FınTeh salasynyń damýyna óz úlesin qosady», - deıdi MAS FınTeh boıynsha basqarýshy dırektory Sopnendý Mohantı.