AHQO Sıngapýr men Shanhaıǵa áýe reısin ashýdy usyndy
«Sońǵy 12 aıda óte jaqsy jetistikterge qol jetkizdik. Bizdiń retteýshi aıasynda eki júzden astam kompanııanyń tirkelýine kelsek, bul kompanııalar arasynda aıtarlyqtaı tanymal uıymdardyń bar ekenin maqtanyshpen aıtqym keledi. Máselen, Qytaı damý banki, Qytaı qurylys banki bar. Sonymen birge, «Bir beldeý - bir jol» bastamasynyń naǵyz qarjylyq habyna aınalǵymyz keledi», - dep atap ótti Qaırat Kelimbetov Astana Finance days aıasynda ótip jatqan AHQO Keńesiniń otyrysynda.
Onyń aıtýynsha, «Astana» halyqaralyq qarjy ortalyǵy shyn máninde ınfraqurylymdyq jáne qarjylyq hab bola alady.
«Úkimet pen QR Ulttyq banki atalǵan jobany qoldap otyr jáne mundaǵy mańyzdy másele – basqa uıymdarmen ózara baılanys ornatý. Sondyqtan, qazir Tokıo, Sıngapýr, Shanhaı syndy iri qalalarǵa tikeleı áýe reısin ashý jóninde Úkimetpen birlesip jumys istep jatyrmyz. Bul «Astana» halyqaralyq qarjy ortalyǵyn iri jahandyq qarjylyq ortalyqtarmen baılanystyra alady», - dep atap ótti Q. Kelimbetov.
Aıta keteıik, QR Prezıdenti Qasym-Jomart Toqaevtyń qatysýymen búgin AHQO soty men Halyqaralyq tórelik ortalyǵynyń ǵımaraty ashyldy.
Eske sala ketsek, Astana Finance Days qarjy forýmy aıasynda Qazaqstan Respýblıkasynyń Prezıdenti Qasym-Jomart Toqaevtyń qatysýymen AHQO Sot ǵımaratynyń jáne Halyqaralyq tórelik ortalyǵynyń ashylý saltanaty ótti. Resmı iske qosylǵan bir jyl ishinde halyqaralyq qarjy ortalyǵy 37 pozıtsııaǵa kóterilip, qarjy ortalyqtarynyń bedeldi jahandyq ındeksinde 51-orynǵa turaqtady.
AHQO soty aǵylshyn jalpy quqyǵynyń normalary men prıntsıpterine negizdelgen sot júıesin usynady. Ol AHQO qyzmetine baılanysty týyndaǵan daýlarǵa, sondaı-aq taraptardyń kelisimi boıynsha AHQO Sotyna beriletin daýlarǵa qatysty erekshe quziretke ıe. AHQO soty óz qyzmetinde táýelsiz jáne Qazaqstan Respýblıkasynyń sot júıesine kirmeıdi. AIFC Halyqaralyq tórelik ortalyǵy (IACC) AIFC-tegi azamattyq jáne kommertsııalyq daýlardy sheshýdiń eń jaqsy halyqaralyq standarttaryna sáıkes áreket etetin táýelsiz, ekonomıkalyq jáne jedel balama usynady.
Sonymen birge, tórelik sottyń ashylýynda Islam damý bankiniń prezıdenti Bandar Hadjar «Astana» halyqaralyq qarjy ortalyǵynyń mańyzdylyǵy týraly aıtty.
«Astana» halyqaralyq qarjy ortalyǵy mıssııasynyń jergilikti naryqta ǵana emes, aımaqtyq jáne halyqaralyq deńgeıde jumys isteý múmkindigi bar. AHQO Ortalyq Azııadaǵy habqa aınalý úshin kóp jumys jasady. Men AHQO Basqarýshy Keńesiniń múshelerin jáne Jer sharynyń eýropalyq bóligindegi jáne Ortalyq Azııadaǵy barlyq qyzmetkerlerdi quttyqtaımyn. Men AHQO retteý jáne basqarý salasyndaǵy aldyńǵy qatarly halyqaralyq tájirıbeni qoldanady jáne engize alady dep sanaımyn. Bul álemniń kóptegen elderi úshin paıdaly tájirıbe bolady. Biz ár ýaqytta Qazaqstandy qoldaımyz», - dedi Bandar Hadjar.
Onyń aıtýynsha, Qazaqstan ıslamdyq ınfraqurylymdy damytý úshin jaqsy irgetasy bar memleket bolyp sanalady.
«Biz ıslamdyq qarjylandyrýdy jáne ınvestorlar paıdalana alatyn kapıtal naryǵyn nasıhattaý úshin jumys isteımiz. Bul jeke sektordyń qatysýymen ekonomıkalyq qarjylandyrýdy qamtamasyz etý úshin qajet. AHQO ıslamdyq qarjylandyrýǵa búkil álemnen ınvestor tartýda senimdi seriktes bola alady. Biz únemi qoldaý kórsetip otyramyz. Bizdiń top sizderdiń mindetterińizdi túsinedi jáne árqashan qoldaıdy. Aldaǵy AHQO qyzmeti Nur-Sultannyń halyqaralyq qarjylyq qyzmetke enýine kómektesedi dep senemin», - dedi B. Hadjar.
Qaırat Kelimbetovtyń aıtýynsha, búginde AHQO retteýshisi retinde tirkelgen kásiporyndarynyń sany álemniń 26 elinen 200-den astam kompanııaǵa artty. Olardyń qatarynda AQSh, Ulybrıtanııa, Shveıtsarııa, Qytaı, Reseı elderi, Qytaı damý banki, qytaı qurylys banki sııaqty iri qarjy ınstıtýttary jáne iri ınvestıtsııalyq bankter bar.
Aıta keteıik, 2019 jyldyń 1-4 shilde kúnderi aralyǵynda elordada Astana Finance Days qarjy forýmy ótedi. Forýmǵa álemniń túrli memleketterinen sarapshylar, saıasatkerler, bıznes ókilderi jáne «Astana» halyqaralyq qarjy ortalyǵyna tirkelgen kompanııa ókilderi qatysady.
Astana Finance Days aıasynda tórt baǵytty qamtıtyn halyqaralyq forým ótedi: ınfraqurylymdyq qarjylandyrý, áserlik qarjylandyrý, ınnovatsııalyq qarjylandyrý, ıslamdyq qarjylandyrý.
AHQO alańynda ıslamdyq qarjylandyrý salasynda qyzmet kórsetetin Malaızııa, Ulybrıtanııa, AQSh jáne Qazaqstan kompanııalaryn tirkelip úlgerdi. Islam Damý Bankiniń kómegimen osy salany damytýdyń «Jol kartasyn» (bas jospar) ázirleý jumystary júrgizilýde.
Astana Finance Days resmı baǵdarlamasy AHQO Halyqaralyq keńesiniń II otyrysymen aıaqtalady.