AHQO men L.N. Gýmılev atyndaǵy EUÝ yntymaqtastyq memorandýmyna qol qoıdy

ASTANA. QazAqparat - «Astana» halyqaralyq qarjy ortalyǵy men L. N. Gýmılev atyndaǵy Eýrazııa ulttyq ýnıversıteti ózara túsinistik jáne yntymaqtastyq týraly memorandýmǵa qol qoıdy, dep habarlaıdy QazAqparat oqý ordasynyń baspasóz qyzmetine silteme jasap.

Qujat aıasynda taraptar ozyq tájirıbe men bilim almasý, sondaı-aq qarjy jáne ilespe qyzmetter naryǵy salasynyń básekege qabiletin arttyrý maqsatynda birlesken bilim berý, zertteý baǵdarlamalary men jobalaryn júzege asyratyn bolyp ýaǵdalasty.  

Qujatqa AHQO basqarýshysy Qaırat Kelimbetov pen EUÝ rektory Erlan Sydyqov qol qoıdy.

«Eýrazııa ulttyq ýnıversıteti - memleketimizdiń aldyńǵy qatarly bilim mekemeleriniń biri. EUÝ bilim salasyndaǵy bedeli halyqaralyq deńgeıde moıyndalyp, birneshe ret marapattarǵa ıe boldy. Búgin qol qoıylǵan memorandým aıasynda AHQO men EUÝ otandyq mamandardyń kadrlyq áleýetin damytýǵa birlese úles qosady», - dedi AHQO basqarýshysy Q. Kelimbetov.

Taraptar arasyndaǵy yntymaqtastyqtyń basym baǵyttary - ıslam qarjy qyzmetteri, bank qyzmeti, kapıtal naryǵy, aktıvterdi basqarý, qarjy tehnologııalary jáne adamı kapıtaldy damytý salasyndaǵy kásibı kadr daıarlaý.

«Memorandýmǵa qol qoıý - bul AHQO men EUÝ arasyndaǵy yntymaqtastyq aıasynda týyndaǵan kóptegen ǵylymı, kásibı máselelerdi birlese sheshýge múmkindik beretin ǵylymı jáne bilim berý protsesin damytý núkteleriniń biri», - dedi EUÝ rektory E. Sydyqov. 

AHQO men EUÝ ózara qyzyǵýshylyq týǵyzatyn salalarda, AHQO negizinde ǵylymı-pedagogıkalyq kadr daıarlaý úshin lektsııalar, trenıngter, master-klastar, onyń ishinde onlaın rejımde ótkizýge nıetti.

Sonymen qatar, «Qarjy», «Esep jáne aýdıt» mamandyqtary boıynsha bakalavrıat, magıstratýra jáne doktorantýra (PhD) deńgeıinde birlesken eksperımenttik bilim baǵdarlamalaryn daıyndaý jáne iske asyrý salasynda yntymaqtastyq qarastyrylǵan.