AHQO Bırjasy birqatar qytaılyq kompanııalarmen kelisimshart bekitti
Atap aıtqanda, AIX Basqarma tóraǵasy Tımotı Bennett China Construction Bank, CITIC Securities, Qytaıdyń sheteldegi kásiporyndardy damytý qaýymdastyǵymen, CITIC Securities ınvestıtsııalyq bankimen, Deheng Law Offices zań fırmasymen jáne China Chengxin International Rating Agency-men mámile jasasty.
Odan bólek, AIX PwC Kazakhstan kompanııasymen yntymaqtastyq týraly kelisimge qol qoıdy.
«Biz «Astana» halyqaralyq qarjy ortalyǵymen jáne qazaqstandyq «QazAtomÓnerkásip» kompanııasymen birlese jumys isteımiz. Bizdiń uzaqmerzimdi kelisimshartymyz bar jáne ınvestıtsııalyq saıasat jumystaryn jalǵastyratynymyzǵa qýanyshtymyz. Qazaqstanǵa ınvestıtsııa salǵysy keletin klıentter óte kóp. Ózim úsh jyldan beri Qazaqstanda jumys istep kelemin», - dep pikir bildirdi PwC kompanııasynyń Eýrazııa elderindegi ókili Kırk Ýıllıams.
Aıta keteıik, Astana halyqaralyq bırjasy (Astana International Exchange) - treıdıng salasyndaǵy jańa tehnologııalardy qoldaný jolymen qurylǵan zamanaýı saýda alańy. Onyń strategııalyq seriktesteri Shanhaı qor bırjasy, Jibek joly qory, NASDAQ bırja toby, Goldman Sachs halyqaralyq qarjylyq toby - bırja men qarjy ındýstrııasynyń jahandyq kóshbasshylary.
Bırja - ulttyq kompanııalardy jekeshelendirý baǵdarlamalaryn júzege asyrýdyń, memlekettik jáne korporatıvtik qundy qaǵazdardy shyǵarý men aınalymǵa salýdyń alańy sanalady. 2016-2020 jyldarǵa arnalǵan Keshendi jekeshelendirý josparyna sáıkes, bırja alańynda ınvestorlarǵa iri ulttyq korporatsııalar men memleket qatysatyn ortasha kompanııalardyń da úlesteri usynylady.