AHQO arqyly qandaı kompanııalar IPO-ǵa shyǵarylady

ASTANA. QazAqparat - "Astana" halyqaralyq qarjy ortalyǵynyń alǵashqy iri qadamy ulttyq kompanııalardyń aktsııalaryn jarııa ornalastyrý bolmaq. Bul týraly búgin Astana Finance Days sessııasynda QR Premer-Mınıstri Baqytjan Saǵyntaev aıtty, dep habarlaıdy QazAqparat tilshisi.

"Bizdiń alǵashqy iri qadamymyz AHQO Bırjasyna asa iri ulttyq kompanııalardyń aktsııalaryn jarııa ornalastyrý bolmaq. Biz IPO-ǵa ulttyq ekonomıka alyptary - «Eır Astana», «Qazatomónerkásip», «Qazaqtelekom» kompanııalary shyǵarylady dep josparlap otyrmyz. 2020 jyldyń sońyna deıin elimizdegi basqa da asa iri «Qazaqstan temir joly», «QazMunaıGaz», «Samuryq-Energo», «Qazposhta», «Taýken Samuryq» jáne «Qazaq Eır» kompanııalarynyń aktsııalary shyǵarylady", - dedi Baqytjan Saǵyntaev.

Úkimet basshysynyń paıymynsha, bul bıznes pen ınvestorlar úshin biregeı múmkindikter.

"Kúni keshe ǵana Astanada álemniń 40 elinen 500 iri kásipkerdiń jáne ınvestorlardyń qatysýymen jyl saıynǵy «Qazaqstanǵa jahandyq ınvestıtsııalar máseleleri jónindegi» dóńgelek ústel otyrysy ótti.  Investorlardyń Úkimetpen tikeleı dıalog ornatýy, seriktestermen pikir almasý elimizde jumys isteýge joǵary ınvestıtsııalyq qyzyǵýshylyq bar ekenin kórsetti. Dóńgelek ústel aıasynda jalpy somasy 4,8 mlrd AQSh dollaryna 30-ǵa jýyq túrli kommertsııalyq qujattarǵa qol qoıyldy. Biz ınvestorlardyń mundaı senimin baǵalaımyz. Qazaqstan Úkimeti barlyǵyńyzdy AHQO qatysýshysy bolýǵa shaqyrady. Qazaqstan óziniń jahandyq ashyqtyǵyn jáne sizdermen dıalog ornatýǵa ázirligin rastaıdy!", - dedi Premer-Mınıstr.