AHQO álemdik qarjy ortalyqtarynyń eń jaqsy tájirıbelerin alady - Ábdiqalyqova
Jıynǵa Konstıtýtsııalyq keńes tóraǵasy Q.Mámı, «Astana» halyqaralyq qarjy ortalyǵynyń basqarýshysy Q.Kelimbetov, Halyqaralyq qarjy ortalyǵy sotynyń tóraǵasy L.Výlf, Qazaqstan Respýblıkasynyń Tuńǵysh Prezıdenti - Elbasy qorynyń atqarýshy dırektorynyń orynbasary I.Rogov, Qazaqstandaǵy elshilikterdiń, memlekettik organdardyń, halyqaralyq arbıtraj ortalyqtary men sottarynyń, jetekshi zań jáne konsaltıngtik fırmalardyń, qarjy korporatsııalarynyń ókilderi jáne t.b. qatysty.
Konferentsııany ashqan G.Ábdiqalyqova Nursultan Nazarbaevtyń: «Astana búkil álemge tek jańa elorda jáne saıası alań bolyp qana tanylyp qoımaı, sonymen birge tehnologııa, qarjy, zııatkerlik resýrstar quıylyp jatatyn ortalyq retinde de tanylsa dedim», - dep aıtqan sózine nazar aýdardy.
«Memlekettik saıasattyń negizgi basymdyǵynyń biri - bıznes júrgizýge meılinshe qolaıly jaǵdaı jasaý. Osy maqsatpen el Prezıdentiniń bastamasy boıynsha erteń tusaýkeseri ótetin «Astana» halyqaralyq qarjy ortalyǵy quryldy. Bul ortalyq álemdik qarjy ortalyqtarynyń eń jaqsy tájirıbelerin alatyn bolady. Bul rette quqyqtyq rejimge aıryqsha kóńil bólinedi. Búginde onyń jumysy Anglııa men Ýels quqyqtary qaǵıdattaryna, normalaryna jáne pretsedentterine, sondaı-aq táýelsiz sot júıesi bar álem moıyndaǵan qarjy ortalyqtarynyń standarttaryna negizdelgen», - dedi G.Ábdiqalyqova.
Basqosýda quqyqtanýdyń qazaqstandyq jáne sheteldik kórnekti qaıratkerleri qarjy ortalyǵynyń qyzmeti salasyndaǵy ózekti máselelerdi, sonyń ishinde «Astana» halyqaralyq qarjy ortalyǵynyń qoldanystaǵy quqyǵymen jáne daýlardy sheshý isimen baılanysty máselelerdi talqylady.
Sońynda Memlekettik hatshy Gúlshara Ábdiqalyqova konferentsııa barysynda syndarly suhbat ornap, tyǵyz iskerlik baılanystar jolǵa qoıylatyndyǵyna senim bildirdi.