Aǵza donorlaryna memleketten ótemaqy berile me – Altaı Kólginov jaýap berdi

ASTANA. QazAqparat – Premer-Mınıstrdiń orynbasary Altaı Kólginov Májilis depýtattarynyń saýalyna bergen jaýabynda donorlyqty yntalandyrý sharalary týraly málimet berdi, dep habarlaıdy QazAqparat tilshisi.

«Dúnıejúzilik densaýlyq saqtaý uıymynyń basqarý qaǵıdattary boıynsha, jasýshalar men tinderdi, organdardy donor retinde usyný aqysyz negizde, qandaı da bir aqshalaı ótemaqy nemese aqshalaı syıaqysyz júzege asady. Sondaı-aq, tiri donordyń ózine de týysqandaryna da jasýsha men tindi, transplantatsııaǵa arnalǵan organdy satyp alýǵa jáne satýǵa tyıym salynǵan.

Aǵza almastyrýǵa týystarynyń kelisimi berilgen, kóziniń tirisinde aǵzasyn berýge bildirgen nıetin egov.kz portaly arqyly rastaǵan adamnyń donorlyq organdary paıdalanylady», - dep jazylǵan jaýapta.

Altaı Kólginovtiń málimetinshe, Densaýlyq saqtaý mınıstrligi Aǵza donorlyǵy men transplantatsııa qyzmetin jetildirýdiń 2023-2025 jyldarǵa arnalǵan is-sharalar josparynyń jobasyn ázirlep jatyr.

«Oǵan úkimettik emes uıymdar da da tartylǵan. Osy jumystardyń aıasynda donorlarǵa memleket esebinen ótemaqy tóleý jáne atalǵan salanyń krımınaldanýyna jol bermeý baǵytyndaǵy yqtımal qaterler máselesi qaralady», - dep jazady vıtse-Premer.