Aǵymdaǵy jyly «Lokomotıv qurystyrý zaýyty» AQ-y otandyq 69 teplovozdy ishki naryqqa, 9 teplovozdy shetelge satýdy josparlap otyr
Bul týraly búgin Astanadaǵy Lokomotıv qurastyrý zaýytynda ótken brıfıng barysynda «LQZ» AQ prezıdenti Marat Tileýbaev málim etti.
«1520 koleıaly temirjoldy paıdalanatyn burynǵy Keńes odaǵy aýmaǵyndaǵy memleketterdiń kópshiliginiń qazaqstandyq «Evolution» teplovozyna suranysy zor. Alaıda teplovozdardy satý úshin ónim sertıfıkattalýy shart. Sondyqtan da, qazirgi tańda qazaqstandyq teplovozdar Reseıde sertıfıkattaýdan ótýde. Monǵolııa tarapy qazaqstandyq teplovozdy satyp alý úshin ónimniń sertıfıkatyn kútip otyr. Budan bólek, Tájikstan da bizden aǵymdaǵy jyly 3 teplovozdy satyp alǵysy keledi», - deıdi M. Tileýbaev. Onyń aıtýynsha, byltyrǵy jyly qazaqstandyq TE33A-0020 teplovozy ıAkýtııada synaqtan ótip, 50 gradýstyq sýyq aıazda jaqsy jaǵynan kórsete bilgen. Sondyqtan da osy elden de suranystar barshylyq. Zaýyt basshysynyń aıtýynsha, búgingi kúni reseılik sertıfıkatty talap etpeıtin Baltyq jaǵalaýy memleketteri de qazaqstandyq teplovozǵa qyzyǵýshylyq tanytqan. «Máselen, Estonııa memleketiniń suranysy boıynsha biz aldaǵy aptada 45-i nómirli teplovozdy sol elden synaqtan ótkizýge joldamaqpyz. 3-4 aı synaqtan keıin Estonııa buǵan óz sertıfıkattaryn berýge qulshynys tanytyp otyr. Sosyn Baltyq jaǵalaýy memleketterine ónimdi shyǵarý máselesi kún tártibine qoıylatyn bolady», - deıdi M. Tileýbaev.
«Budan bólek, Reseıdiń ishki naryǵyndaǵy 20-ǵa tarta jekemenshik kompanııalar qyzyǵýshylyq tanytýda. Árıne, onyń barshasy otandyq teplovozdyń sertıfıkatyn tosyp otyr. Jalpylama alǵanda biz bıyl 69 lokomotıvti «Qazaqstan temir jolyna», al 9 lokovotıvti shet elderge satýǵa shyǵarýdy josparlaýdamyz», - dedi ol. Zaýyt basshysynyń aıtýyna qaraǵanda, «Qazaqstan temir joly» AQ-ǵa satylatyn teplovozdardyń baǵasy 3 mln. 900 myń dollardy qurasa, shetelge satylatyn otandyq teplovozdyń baǵasy 4 mln. 800 myń dollardyń shamasynda belgilenip otyr.