Aǵylshyn jazýshysy qazaq mádenıeti týraly balalarǵa arnap kitap jazdy

LONDON. QazAqparat - Aǵylshyn jazýshy Lýıs Pýl qazaq halqynyń ejelgi mádenıeti men dástúri týraly syr shertetin «Jaryq juldyz» atty balalar kitabyn jazdy. Bundaı kitap shyǵarý ıdeıasy avtordyń mektep jasyndaǵy qyzymen birge Shropshır graftyǵyna barǵan kezde paıda bolǵan, dep habarlaıdy QazAqparat tilshisi.

Erkin jaıylyp júrgen jabaıy jylqylardy kórgen qyzy olardyń shyǵý jáne qolǵa úıretilý tarıhy týraly suraıdy. Lýıs úıine oralyp, bizdiń zamanymyzǵa deıingi V-IV ǵasyrlardaǵy Botaı mádenıeti týraly zertteı bastaıdy. Botaı mádenıeti ejelgi adamnyń alǵash ret jylqyny qolǵa úıretkendigimen álemge áıgili jáne bul tarıhı oqıǵa Qazaqstanda kórinis tapqan.

« Bul meni tánti etti. Zertteýdi sál tereńirek júrgizýdi uıǵardym. Birazdan soń mıymda áńgimeniń jelisi paıda bola bastady. Qazaqstan týraly málimetter jınadym. Jylqynyń qaıdan kelgenin, qalaı jersindirilgenin bildim. Qazaqstannyń tabıǵaty, halqy týraly da biraz maǵlumatqa qanyqtym», - dedi Lýıs Pýl QazAqparat tilshisine.

Kitaptyń basty keıipkeri Raýshan esimdi 12 jastaǵy qyz jáne Jaryq juldyz atty jylqy. Oqıǵa jelisine sáıkes Raýshan janýardyń tilin taýyp dostasady. Shyǵarmanyń basty oqyrmany 7 men 11 jas aralyǵyndaǵy balalar, -deıdi avtor.

Biraq eresek adamdar da odan ózine keregin taba alady.

«Tarıhty jaqsy kóretin, Qazaqstan týraly bilgisi keletin eresekter de ádebı shyǵarmaǵa degen qyzyǵýshylyǵy artpaq. Kitap sórelerinen tabylýy tıis dúnıe dep oılaımyn. Osylaısha Qazaqstannyń álemdegi tanymaldylyǵy artady degen úmittemin», -deıdi jazýshy.

Lýıstyń negizgi mamandyǵy - sýretshi. Sondyqtan kitaptyń ıllıýstratsııasymen ózi aınalysqan.

Ádebı shyǵarmanyń jaryq kórýine joldasy Stıv Pýl kómektesken.

«Men kitaptyń shyǵarylýyna qarjylaı qoldaý kórsettim. Sonymen qatar Lýısty rýhanı turǵyda da demeýge tyrystym. Zertteýler júrgizýine járdemdestim»,- deıdi ol.

Kitap avtory Qazaqstandy kórgisi keledi.

«Men Qazaqstanda eshqashan bolǵan emespin. Biraq qýana barar edim. Mádenıeti, tarıhy, halqy erekshe qyzyqtyrady. Sondaı-aq almalardyń pisken kezin kórgim keledi. Ejelgi adamdardyń tasqa qashap jazǵan jazýlaryn da tamashalaǵym bar», - deıdi avtor.

Búginde kórkem shyǵarmany onlaın saýda dúkenderi arqyly satyp alýǵa bolady. Jýyq arada elektrondyq nusqasyn da shyǵarý josparda bar, deıdi Lýıs Pýl. Buǵan qosa ol kitaptyń jalǵasyn jazǵysy keledi.

«Raýshan men Jaryq juldyzdyń bastan keshkenderi áli bitpedi», -deıdi jazýshy.