Aǵylshyn tiliniń 1200 muǵalimi halyqaralyq joba aıasynda tegin kýrs oqıdy

ASTANA. QazAqparat - Aǵylshyn tili pániniń 1 200 muǵalimi halyqaralyq joba aıasynda quzyretin arttyrý kýrsynan ótedi. Bul týraly «Órleý» biliktilikti arttyrý ulttyq ortalyǵy oqý jumysy departamentiniń dırektory Erjan Tileýbergenov málim etti, dep habarlaıdy QazAqparat.

Onyń aıtýynsha, «Órleý» ortalyǵy «Brıtan keńesi» halyqaralyq uıymymen birlesip aǵylshyn tili muǵalimderine arnalǵan Future English Online Teacher Community baǵdarlamasy boıynsha trenıngter ótkizedi.

Halyqaralyq joba álemniń 6 elinde júzege asyrylyp jatyr.

«Kýrs 17 qazanda bastalyp, 23 jeltoqsanǵa deıin jalǵasady. Qazaqstanda bul joba «Órleý» bazasynda ekinshi jyl qatarynan ótkizilip otyr. Sondaı-aq bul bastama jyl saıyn bolady dep kútilip otyr», - dedi «Órleý» biliktilikti arttyrý ulttyq ortalyǵy oqý jumysy departamentiniń dırektory Erjan Tileýbergenov.

Joba 11 apta boıy qashyqtan oqytýǵa arnalǵan jáne aǵylshyn tili muǵalimderiniń úzdiksiz kásibı damýyn kózdeıdi.

«Bıyl muǵalimderdi qabyldaý jáne olardyń aǵylshyn tilin meńgerý deńgeıin anyqtaý boıynsha testileý aıaqtaldy. Jaqynda 1 200 muǵalim oqýǵa kirisedi. Bul joba bizdiń respýblıka muǵalimderiniń aǵylshyn tilin oqytýdaǵy quzyretin arttyratynyna senemiz», - dedi Erjan Tileýbergenov.

Foto: ourreg.ru