Aǵylshyn tilinde shyqqan «Ahmet Baıtursynuly jáne Alash» kitaby Londonda tanystyryldy

LONDON, QazAqparat – Londonda Ahmet Baıtursynulynyń 150 jyldyǵyna oraı konferentsııa ótti. Sharada aǵylshyn tiline alǵash ret aýdarylǵan «Ahmet Baıtursynuly jáne Alash» kitabynyń tusaýy kesildi. Brıtanııalyq shyǵarmashylyq ıntellıgentsııa ult ustazynyń ómirbaıanymen jáne eńbekterimen tanysyp, pikir bólisti, deıdi QazAqparat tilshisi.

«Ahmet Baıtursynuly jáne Alash» kitabyn aǵylshyn tiline tárjimalaǵan aýdarmashylardyń biri - Arch Teıt. Ol buǵan deıin Shoqan Ýálıhanovtyń tańdamaly shyǵarmalaryn da aýdarǵan. Biraq túpnusqa tilden emes, orys tilinen. Teıt qazaqtyń baı murasyn sol qalpynda jetkizý úshin endi qazaqsha meńgerý qajettigin aıtady.

«Qazaq tilin úırengim keledi. Baıtursynulynyń shyǵarmalary meniń tilge degen mahabbatymdy oıatty», - deıdi ol.

Budan bólek, ol halqymyzdyń basynan ótken, biraq tarıh tasasynda qalyp qoıǵan kóptegen beımálim derekter álem jurtshylyǵynyń nazaryna usynylý kerek degen pikirde.

«Menińshe, bul kitap Qazaqstan tarıhyndaǵy aqtańdaqtardyń betin ashyp, qazaq tili men ádebıeti týraly mańyzdy aqparatty aǵylshyntildi aýdıtorııaǵa pash etedi. Ahmet Baıtursynuly Reseı patshalyǵy zamanynda qýdalaýǵa ushyrasa da, túrmege toǵytylsa da júrekjutqan jan bolǵan. Ol óziniń mıssııasyna adal bolyp, qazaq ulty úshin basyn báıgege tikken adam», - deıdi Arch Teıt.

Qazaqstannyń Birikken Koroldiktegi elshiligi uıymdastyrǵan sharaǵa brıtanııalyq shyǵarmashylyq ıntellıgentsııa ókilderi qatysty. Aǵylshyn aqyn-jazýshylaryna, aýdarmashylaryna Ahmet Baıtursynulynyń ómiri jáne shyǵarmashylyǵymen tereńirek tanysýǵa jaǵdaı jasaldy.

«Men Baıtursynulynyń shyǵarmalarymen endi tanysyp jatyrmyn. Onyń qazaq halqynyń birtýar uly, ult reformatory, oqý-aǵartý isiniń dúldúli bolǵanyn bildim. Bul týraly eýropalyq oqyrmandar da habardar bolýy kerek dep oılaımyn. Menińshe, sheteldikter osyndaı kitaptardyń arqasynda Qazaqstan tarıhymen jáne ǵulamalarymen tanysýǵa mol múmkindik alady», - deıdi aǵylshyn jazýshysy ári aýdarmashysy Djon Farndon.

Kitapty Ulttyq aýdarma bıýrosy basyp shyǵarǵan. Jınaqqa qazaq ádebıeti jáne mádenıeti kórnekti qaıratkerleriniń Ahmet Baıtursynuly týraly jazǵan eńbekteri engen. Іshininen Muhtar Áýezov, Mirjaqyp Dýlatov, Sáken Seıfýllınnen bólek, Mámbet Qoıgeldi, Darhan Qydyráli, Dıhan Qamzabekuly sııaqty qazirgi alashtanýshy ǵalymdardyń zertteýlerin de tabýǵa bolady.

Foto: QR Ulybrıtanııa jáne Soltústik Irlandııa Qurama Koroldigindegi Elshiligi