Aǵylshyn tili muǵalimderi men ınjenerlerdi daıarlaýǵa erekshe mán beriledi - Halyqaralyq baǵdarlamalar ortalyǵy

ASTANA. QazAqparat - «Bolashaq» stıpendııasy boıynsha irikteý kúsheıtildi. Bul týraly búgin QR Memlekettik hatshysy Gúlshara Ábdiqalyqovanyń tóraǵalyǵymen ótken Shetelde kadrlar daıarlaý jónindegi respýblıkalyq komıssııanyń kezekti otyrysynan keıin «Halyqaralyq baǵdarlamalar ortalyǵy» AQ prezıdenti Ǵanı Nyǵymetov málim etti.

«Mańyzdy baǵyttardyń biri «Bolashaq» stıpendııasynyń sapasy men tıimdiligin arttyrýǵa arnalǵan. Bul turǵyda birqatar sharalar qabyldanyp, irikteý talaptary kúsheıtildi. Shet tilin bilý deńgeıine, dıplomnyń ortasha balyna, jumys ótiline qatysty talaptar kúsheıdi. Bunyń barlyǵy irikteý úderisin sapaly júrgizýge,eń daryndy jastardy anyqtaýǵa negizdelgen»,-dep toqtaldy Ǵ. Nyǵymetov.
Onyń sózine qaraǵanda, osy jyldan bastap taǵylymdamalardyń modeli ózgerdi.
«Eger de buryn taǵylymdama jalpy bolsa, qazir tek maqsatty túrde «100 naqty qadamda» kórsetilgen josparlarǵa arnalady. Sonyń ishinde aǵylshyn tili muǵalimderin, medıtsınalyq mamandardy, sot júıesindegi kadrlardy daıarlaý, sondaı-aq «Astana» halyqaralyq qarjy ortalyǵyna bilikti mamandardy daıarlaý baǵyttaryn bizdiń taǵylymdama baǵdarlamamyz tolyqtaı qamtıtyn bolady»,-dedi «Halyqaralyq baǵdarlamalar ortalyǵy» AQ prezıdenti.
Bul rette Ǵ. Nyǵymetov jaqyn arada úsh tildi júıesine engizý úshin aǵylshyn tiliniń 500 muǵalimin daıarlaý kózdelgenin atap ótti. Sondyqtan da taǵylymdama baǵdarlamasy boıynsha muǵalimder oqýǵa jiberiledi.
Munymen qosa, ındýstrııalandyrý úshin, ınnovatsııalyq ekonomıkaǵa ınjenerlik-tehnıkalyq mamandar qajet bolǵandyqtan, magıstratýraǵa ınjenerlik-tehnıkalyq qyzmetkerdiń jańa sanaty engizildi.