Aǵylshyn sarapshysy Bozjyra týrıstik keshenin salýǵa baılanysty pikir bildirdi

NUR-SULTAN. QazAqparat – Anglııanyń qala qurylysy koroldik ınstıtýtynyń múshesi, «Urban Living» JShS platskeımıng dırektory Rıkardo Marını Bozjyra shatqalyndaǵy týrıstik keshenniń qurylysy týraly pikir aıtty. Bul týraly QazAqparat tilshisi QR Mádenıet jáne sport mınıstrliginiń baspasóz qyzmetine silteme jasap habarlaıdy.

Ol Mádenıet jáne sport mınıstrliginiń shaqyrýymen Mańǵystaý oblysyndaǵy jurtshylyqpen kezdesýge keldi.

«Maǵan Bozjyra shatqaly qatty unady. Men kóptegen eldi araladym, kóptegen kórikti jerdi kórdim, biraq bul erekshe aımaq eken. Oǵan uqypty qaraý, aýmaqty qorǵaý jáne týrıster aǵynyn retteý úshin barlyq sharalardy qabyldaý óte mańyzdy», - deıdi Rıkardo Marını.

Onyń aıtýynsha, ınfraqurylym, baılanys jáne bilim Bozjyra sııaqty tabıǵı resýrstardy saqtaýdyń ajyramas bóligi retinde qatar júrýi kerek.

«Eger qonaq úı qory shatqaldy qorǵaýǵa, bilim jáne baılanys ornatýǵa baǵyttalsa, ınvestorlar qorshaǵan ortany qorǵaýǵa óte muqııat qaraıtyn bolsa, qaldyqsyz mehanızmniń maksımaldy mehanızmi bolsa – onda bul jaqsy ıdeıa. Týrısterge tabıǵat aıasynda ózin qalaı ustaý kerektigin, qoqysty qalaı jınaý kerektigin túsindiretin nusqaýlyq bolsa, Bozjyrany búkil álemdegi tabıǵı eskertkishter sııaqty turaqty túrde damytýǵa bolady», - deıdi ol.