Aǵylshyn klýbynyń shabýylshysy taǵy bir úzdik kórsetkishke qol jetkizdi

ASTANA. QazAqparat – Aǵylshyndyq «Manchester Sıtı» klýbynyń shabýylshysy, norvegııalyq Erlıng Holand taǵy bir úzdik kórsetkishke qol jetkizdi, dep habarlaıdy QazAqparat tilshisi.

Premer-lıganyń 34-týrynda «Manchester Sıtı» syrt alańda «Fýlhemdi» 2:1 esebimen utyp, týrnır kestesinde birinshi orynǵa kóterildi.

Osy oıynda 3-mınýtta E.Holand penaltıden esep ashty. Bul onyń «Manchester Sıtı» sapynda bıylǵy maýsymdaǵy 50-inshi goly edi.

Sóıtip ol sońǵy 92 jylda bir maýsymda 50 gol soqqan birinshi fýtbolshy atandy. Buǵan deıin mundaı nátıjege Dıksı Dın (63 gol, 1927-1928 jylǵy maýsym), Vık Ýotson (50 gol, 1929-1930) jáne Tom Ýorıng (50 gol, 1930-1931), nebári úsh oıynshy ǵana qol jetkizdi.

Erlıng Holand qarsylastar qaqpasyna Aǵylshyn premer-lıgasynda 34, Chempıondar lıgasynda 12, Anglııa kýboginde 3 jáne Aǵylshyn lıgasy kýboginde 1 gol engizdi. 22 jastaǵy norvegııalyq shabýylshy bir maýsymda premer-lıgada 34 gol avtory atanyp, absolıýtti rekord ornatqan Endı Koýl («Nıýkasl», 1993-1994) jáne Alan Shırerdi («Blekbern», 1994-1995) de qýyp jetti.

Eske sala keteıik, budan buryn «Manchester Sıtı» shabýylshysynyń Aǵylshyn lıgasynda rekord ornatqanyn jazǵan bolatynbyz.

Sondaı-aq «Qaırat» Qazaqstan kýboginiń shırek fınalyna joldama aldy.