Agrosektordy saýyqtyrýdyń jáne Tsesnabank ornyqtylyǵyn kóterýdiń tetigi bekitildi

ASTANA. QazAqparat - Ótken aptada QR Úkimeti men QR Ulttyq Bankiniń Birlesken málimdemesinde aýyl sharýashylyǵy ónimin óndirýshilerdi jáne búkil agrarlyq sektordy qoldaýdy kózdeıtin is-sharalar paketi usynyldy. Osy jumystar aıasynda 2018 jylǵy 19 qyrkúıekte QR Úkimeti men QR Ulttyq Banki «Tsesnabank» AQ-nan 450 mlrd teńgeniń aýyl sharýashylyǵy nesıeleriniń portfelin satyp alý tetigin bekitti.

Bul týraly QR Úkimetiniń baspasóz qyzmeti habarlaıdy.

Taıaý kúnderi aýyl sharýashylyǵy ónimin óndirýshiler úshin ahýaldy jaqsartýǵa, sondaı-aq nesıe portfeliniń sapasyn túbegeıli jaqsartý esebinen «Tsesnabank» AQ-nyń ornyqtylyǵyn arttyrýǵa múmkindik beretin tetik iske asyrylatyn bolady.

«Tsesnabank» AQ «QazAgro Ulttyq basqarýshy holdıngi» AQ birlesip aýyl sharýashylyǵy ónimin óndirýshilerge berilgen valıýtalyq nesıelerdi nesıelendirý merzimderin uzarta otyryp, teńgelik nesıege aıyrbastaý tetigin bekitti. Bul agroónerkásiptik keshen kásiporyndarynyń qaryzdyq júktemesin jáne syrtqy faktorlardyń áserinen bolatyn baǵamdyq aýytqýlarǵa táýeldilikti azaıtady.

Qolǵa alynyp jatqan is-sharalar aıasynda memleket eldiń agrarlyq sektoryn qoldaýdy, sondaı-aq aýyl sharýashylyǵy ónimin óndirýshilerdi nesıelendirý salasynda jetekshi oryn alyp otyrǵan jáne eldiń qarjylyq sektory úshin júıeli mańyzǵa ıe «Tsesnabank» AQ ornyqtylyǵyn qamtamasyz etti.

Aýylsharýashylyq kredıtteri portfeliniń bóligin ótep alý boıynsha mámile nátıjesinde, jaqyn arada «Tsesnabank» AQ 450 mlrd. teńge alady dep kútilýde, bul onyń qosymsha turaqtylyǵyn jáne ótimdilik kórsetkishterin qamtamasyz etedi. "Tsesnabank" AQ «QazAgro» ulttyq basqarýshy holdıngi» AQ-pen birlesip, buryn berilgen valıýtalyq kredıtterdi teńgelik kredıtterge qaıta qarjylandyrady jáne merzimin uzartady. Atalǵan sharalar memlekettiń agroónerkásip keshenin saýyqtyrýǵa, sondaı-aq Tsesnabanktiń turaqty qyzmetine degen múddeliligin rastaıdy.

"Tsesnabank" AQ dástúr boıynsha aýylsharýashylyq salasynda mańyzdy ról atqarady jáne kásipkerlikti qoldaý boıynsha memlekettik baǵdarlamalardyń belsendi qatysýshysy. Banktiń AÓK-ti saýyqtyrýǵa baǵyttalǵan "Agrobıznes-2020" baǵdarlamasyna qatysý úlesi 65%-dan asady.

"Tsesnabank" AQ Basqarma Tóraǵasy Ýlf Vokýrka osyǵan baılanysty pikirin bildirdi.

"Ekonomıkasynyń negizin aýyl sharýashylyǵy quraıtyn Ortalyq jáne Soltústik aımaqtarda Tsesnabank burynnan  kóshbasshylyq dárejege ıe. Bank qashanda otandyq agroónerkásiptik keshen kásiporyndary úshin senimdi qarjylyq seriktes bolǵan jáne solaı bolyp qala bermek. Biz Qazaqstan Respýblıkasy Úkimetiniń, QR Ulttyq Bankiniń, «QazAgro» holdınginiń sharalaryn tolyq qoldaımyz. Bul agrosektordyń damýyna jańa serpin beretin ýaqytyly qabyldanǵan sheshim. Óz kezeginde, Tsesnabank aktsıonerleri qysqa merzim ishinde banktiń kapıtalyn tolyqtyrý boıynsha mindettemelerdi qabyldady. Osyndaı pozıtıvti jańalyq klıentterimizdiń jáne seriktesterimizdiń senimin arttyratynyna senimdimin", - dedi ol sózinde.