Agrosaladaǵy suraqtarǵa jyldam jaýap beretin Telegram-bot iske qosyldy

NUR-SULTAN. QazAqparat - QR Aýyl sharýashylyǵy mınıstrligi Telegram messendjerinde chat-botty iske qosty. Endi mınıstrliktiń halyqqa jáne fermerlerge kórsetetin memlekettik qyzmetterin jedel alýǵa múmkindik bar, dep habarlaıdy QazAqparat.

«2019-2020 jyldary «Halyq únine qulaq asatyn memleket» tujyrymdamasy jáne AÓK salasyn tsıfrlandyrý jónindegi mindetter sheńberinde QR Aýyl sharýashylyǵy mınıstrligi barlyq memlekettik qyzmetterdi ońtaılandyryp, elektrondyq formatqa aýdardy. Atqarylǵan jumystar týraly tolyq aqparat ótken jyldyń jeltoqsan aıynda vedomstvonyń memlekettik qyzmetter kórsetý salasyndaǵy 2020 jylǵy qyzmeti týraly esep barysynda jarııalanǵan bolatyn.

Kelesi kezeńde AShM ótinishterdi berýdi jáne anyqtamalar men memlekettik qyzmetterdi alýdy jeńildetetin qural - resmı Telegram-bot engizdi», - dedi mınıstrlikten.

Málim etilgendeı, Agro-bot qoldanýshylarmen qazaq jáne orys tilderinde «tildesedi», suranystarǵa jaýap beredi, sýbsıdııalaý, ósimdik sharýashylyǵy, mal sharýashylyǵy, veterınarııa, ósimdikterdi qorǵaý jáne karantın, lıtsenzııalaý, jer qatynastary jáne ózge de máseleler boıynsha anyqtamalyq aqparatty jedel bere alady. Sonymen qatar atalǵan baǵyttar boıynsha memqyzmetterdi alýǵa bolady. Elektrondyq qyzmetke tapsyrys berý úshin Agro-bot paıdalanýshyny egov.kz portalynyń qajetti paraqshasyna ótkizedi.

Sondaı-aq Agro-bot arqyly usynystar, shaǵymdar qaldyrýǵa, QR Aýyl sharýashylyǵy mınıstrligimen jáne vedomstvonyń baspasóz qyzmetimen jedel baılanysýǵa múmkindik bar.