Agroónerkásipti damytý: Atbasarda birqatar ınvestjoba júzege asyrylýda

KÓKShETAÝ. QazAqparat - Atbasar Aqmola oblysyndaǵy aýyl sharýashylyǵy men ónerkásip salasy qatar damyǵan irgeli aýdandardyń biri sanalady. Aýdanda agroónerkásiptiń damýyna eleýli úles qosatyn birqatar ınvestıtsııalyq joba júzege asyrylyp jatyr, dep habarlaıdy QazAqparat tilshisi.

Atbasar aýdanynyń ákimi Amanbek Qaljanovtyń málimetinshe, óńirde agroónerkásip salasy qarqyndy damyp keledi.

«Memleket basshysy Joldaýda alǵa qoıǵan mindetterge oraı, aýdan áleýmettik ekonomıkalyq damýdyń barlyq salalaryna jete kóńil bólip, jyl saıyn jaqsy kórsetkishterge qol jetkizip keledi. Ónerkásip salasy birshama jaqsy qarqynmen damyp keledi desek, aýdan ekonomıkasynyń negizi – agrarlyq sala, onyń ishinde eginshilik. Osy oraıda, atbasarlyq dıqandar bıylǵy jyldyń kóktemgi egis naýqanyn belgilengen ýaqytta zor uıymshyldyqpen sapaly ótkizdi. Tıisti tuqym qory jasalyp, jeńildetilgen baǵamen janar-jaǵar maı satyp alyndy jáne naýqanǵa qajetti tehnıka jumysqa ázirlik sapyna qoıylyp, osynyń nátıjesinde tuqym sebý naýqany belgilengen ýaqytta qysqa merzimde aıaqtaldy», - deıdi aýdan ákimi Amanbek Qaljanov.

Aýdan basshysy atap ótkendeı, bıylǵy jyldyń alǵashqy jartyjyldyǵynda aýdan agrarshylary 8 mlrd 410 mln teńgeniń ónimin óndirgen. Bul ótken jyldyń osyndaı kezeńimen salystyrǵanda 17 paıyzǵa joǵary. Jalpy ónim ındeksi 101,6 paıyzdy qurap otyr.

«Aýdanda mal sharýashylyǵy salasy da jaqsy qarqynmen damyp keledi. Mal basy artýda. Qazirgi kúni aýdan sharýashylyqtarynda 54,9 myń bas qoı men eshki, 17,3 myń bas jylqy bar. Qoı sany ótken jylmen salystyrǵanda 10 paıyzǵa, al jylqy 11,9 paıyzǵa ósti. Sonymen birge 30,9 myń bas iri qara jáne 9,7 myń shoshqa bar. Jyl basynan 3250 tonna et, 12 409 tonna sút óndirildi. Et óndirý ótken jyldyń sáıkes kezeńimen salystyrǵanda 0,3 paıyz, al sút óndirý 3 paıyzǵa artty. Sondaı-aq osy kezeńde 4,3 mln dana jumyrtqa óndirildi», - dep tolyqtyrdy Amanbek Qaljanov.

Sonymen qatar Atbasar aýdanynda 2023 jyly jalpy kólemi 5 mlrd 250 mln teńgeni quraıtyn 12 ınvestıtsııalyq joba júzege asyrylýda.

«Bul jobalardyń qatarynda agroónerkásip salasynyń damýyna eleýli áser etetin «Bıdaı Agro Traıd» seriktestiginiń astyq saqtaý qoımasy, «Arman Atbasar Agro» seriktestiginiń naýbaıhanasy, «Shýıskoe HHІ» seriktestiginiń kókónis saqtaý qoımasy sııaqty iri jobalar bar», - dep túıindedi aýdan ákimi.

Aıta ketsek, budan buryn Aqmola oblysynda kanadalyq tehnologııa boıynsha sút fermasy salynyp jatqanyn jazǵan edik.