Agroónerkásip kesheniniń 170-ke jýyq sýbektisi qarjylaı saýyqtyrýdan ótedi
Bul rette elimizdiń agroónerkásip kesheniniń 170-ke jýyq sýbektisi qarjylaı saýyqtyrýdan ótedi. Bul týraly búgin «QazAgro» holdıngi ókilderimen ótken brıfıngte málim boldy.
Toqtala ketetin jaıt, qarjylaı saýyqtyrý baǵdarlamasy - memlekettik qoldaý sharalaryn qosqanda, arnaıy tehnıka men jabdyqtardy ıelenýge alǵan nesıelerin arzandatýǵa múmkindik beredi. Bul rette qarjylyq saýyqtyrý sheńberinde nesıelerdi qaıtarý merzimi 9 jylǵa deıin uzartylady jáne aıyppuldar men ósimaqylar alynyp tastalady.
Osyǵan oraı, «Qazagromarketıng» AQ bıyl Qarjylyq saýyqtyrý komıssııasynyń 4 otyrysyn ótkizip, onda 169 agroónerkásip kesheni sýbektisine qatysty qarjylyq saýyqtyrý sharalaryn qoldaný týraly sheshim qabyldady. Atalǵan sýbektiler nesıeleri boıynsha negizgi qaryzdyń jalpy somasy 149,2 mlrd. teńgeni quraıdy.
Eske salsaq, AÓK sýbektilerin qarjylyq saýyqtyrý baǵdarlamasy elimizde ekinshi jyl qatarynan iske asyp keledi. Jalpy, byltyrdan beri negizgi qaryz somasy 167,6 mlrd. teńgeni quraıtyn 217 agroónerkásip kesheni sýbektisiniń ótinishteri qanaǵattandyrylǵan.