Agroónerkásip keshenin damytý asa mańyzdy – Senat depýtaty
«Memleket basshysy Joldaýda aýyl sharýashylyǵy salasyn damytýǵa erekshe kóńil bóldi. Bul – óte mańyzdy sala, sebebi elimizdiń azyq-túlik qaýipsizdigin qamtamasyz etý agroónerkásip keshenin damytýmen tikeleı baılanysty.
Prezıdent myna máselelerge nazar aýdartty.
Olardyń birinshisi, jeke-qosalqy sharýashylyqty damytý máselesi. Elimizdiń aýyl sharýashylyǵy taýarlarynyń negizgi bóligi jeke sharýashylyqtarda óndiriledi. Olardyń mal sharýashylyǵyndaǵy úlesi 70 paıyzdy, keıbir jemis-jıdek túrlerin ósirýdegi úlesi 90 paıyzdy quraıdy. Elimizdegi azyq-túlik máselesin sheshý úshin osy sharýashylyqtardyń áleýetin durys paıdalaný kerek», - dedi senator.
Sondaı-aq, ol Prezıdent aýyl sharýashylyq kooperatıvterin qurý týraly máselege toqtalǵanyn jetkizdi.
«Aldaǵy ýaqytta jeke sharýashylyqtardyń basyn qosyp, irilendirip, kooperatıvter qurý arqyly memleket tarapynan berilip otyrǵan qoldaýdy alýǵa múmkindik bar. Bul jaǵdaıda sýbsıdııaǵa qoljetimdilik ósedi. Mine osy baǵytta da úlken jumystar atqarylýy kerek.
Aýyl sharýashylyq ónimderin óndirý, óńdeý, tasymaldaý máselesi de nazardan tys qalǵan joq. Búginde bul baǵytta biryńǵaı jeli qalyptastyrý asa mańyzdy. Onyń arqasynda óndirilgen ónimdi tutynýshyǵa deıin jetkizýdiń tetikteri naqtylanatyn bolady. Osy jeliniń quramyndaǵy barlyq qatysýshylardyń normatıvtik-quqyqtyq máseleleri sheshilip, bir júıege kelýi shart. Osylaısha bizdiń aýyldardaǵy shaǵyn jeke sharýashylyqtardyń ónimi bizdiń azyq-túlik qaýipsizdigin qamtamasyz etýimizge jumys isteıdi», - deıdi Dúısenǵazy Mýsın.
Deptýtat Memleket basshysy aýyl sharýashylyq maqsatyndaǵy jerler máselesine kóńil bólgeni týraly aıtty.
«Jer sheteldikterge satylmaıtyny taǵy bir márte naqty aıtyldy. Keler jyly Jer kodeksiniń keıbir máseleleri boıynsha moratorıı ýaqyty aıaqtalady. Osyǵan oraı Úkimetke aýyl sharýashylyǵy maqsatyndaǵy jerlerdi naryqtyq aınalymǵa engizý ádis-tásilderin qarastyrý tapsyryldy. Bul da óńirlerdegi kezdesýlerimizde azamattardyń kóterip júrgen ózekti máseleleriniń biri.
Sonymen qatar aýyl sharýashylyǵyndaǵy kadr máselesi kóterildi. Óńirlerdegi kezdesýlerimizde veterınarııa mamandarynyń jetkiliksizdigi, olardyń eńbekaqysynyń tómendigi aıtylyp júr. Bizdiń oıymyzsha osy oraıda malshylardyń da mártebesin kóterý týraly oılanýymyz kerek. Olarǵa áleýmettik paket qarastyrý mańyzdy. Bul boıynsha Úkimet basshysyna da depýtattyq saýal joldaǵanbyz.
Jalpy alǵanda, aýyl sharýashylyǵynyń máseleleri jetkilikti. Olardyń birqataryn Prezıdent halyqqa Joldaýynda jarııa etti. Endigi bizdiń mindetimiz – osy tapsyrmalardy júzege asyrý úshin sapaly zańdar qabyldaý», - dep tolyqtyrdy.