Agrarlyq ǵylym nátıjelerin kommertsııalandyrý qalaı júrgizilýde

NUR-SULTAN. QazAqparat – Ulttyq agrarlyq ǵylymı bilim berý ortalyǵynyń basqarma tóraǵasy Tóleýtaı Raqymbekov agrarlyq ǵylym nátıjeleriniń qanshalyqty paıdaǵa jarap jatqanyn aıtyp berdi, dep habarlaıdy QazAqparat tilshisi.

«Qazirgi tańda elimizde ǵylymı zertteý nátıjelerin kommertsııalandyrý boıynsha jumys bastaldy. Ǵylym óz kezeginde óz jumysynyń nátıjelerin Agrotehnologııalar transferti jáne kommertsııalandyrý ortalyǵyna usynady. Ortalyq fermerlermen lıtsenzııalyq kelisimge kelip, olardan ıntellektýaldyq menshikti paıdalanǵany úshin roıaltı (lıtsenzııalyq syıaqy) alyp otyrady. Osydan keıin roıaltıdiń 30 paıyzy ǵalymdarǵa beriledi. Al taǵy 30 paıyzy ǴZI shotyna aýdarylsa, qalǵan 40 paıyzy jańa zertteýler qoryna beriledi», - dedi Tóleýtaı Raqymbekov Parlament Májilisindegi agrarlyq máseleler komıtetiniń agrarlyq ǵylymdy, bilim jáne óndiristi ıntegratsııalaý máseleleri boıynsha otyrysynda.

Osy mehanızm boıynsha elimizde jalpy somasy 108 mıllıon teńgege 32 kelisimge qol qoıylǵan. Onyń 32 mıllıon teńgesi suryptardyń avtorlaryna berilgen.

«Qazaqstandaǵy roıaltıdiń áleýetti qoryn jylyna 10 mlrd teńgege deıin jetkizýge bolady. Mundaı jaǵdaıda ol somanyń 3 mlrd teńgesin ǵalymdarǵa berýge bolar edi. Bıyl roıaltıdiń kólemin 700 mln teńgege jetkizý josparda bar», - dedi ol.

Tóleýtaı Raqymbekov roıaltı júıesi ǵalymdardyń tabysyn arttyryp qana qoımaı, jumys sapasyna mańyz berýge jigerlendiretinin aıtady.

Aıta ketsek, buǵan deıin Tóleýtaı Raqymbekov otandyq agrarlyq ǵylymnyń basty problemalaryn ataǵan bolatyn. Onyń aıtýynsha, bizdegi agrarlyq ǵylymnyń basty máselesi – bilim berý, transfert pen kommertsııalyq tehnologııalardy usyný boıynsha uıymdastyrý jumysynyń álsizdigi bolyp otyr.