Agrarlyq ǵalymdar dıqandarǵa arnap 52 onlaın keńes ótkizdi

NUR-SULTAN. QazAqparat – Ulttyq agrarlyq ǵylymı-bilim berý ortalyǵy 30 naýryzdan bastap búginge deıin aýyl sharýashylyǵy taýaryn óndirýshilerge 52 onlaın keńes ótkizdi. Bul týraly Ortalyq kommýnıkatsııalar qyzmetinde ótken onlaın baspasóz konferentsııasynda aıtyldy, dep habarlaıdy QazAqparat tilshisi.

«QR Aýyl sharýashylyǵy mınıstrligi janyndaǵy «Ulttyq agrarlyq ǵylymı-bilim berý ortalyǵy» ár ýaqytta taýar óndirýshilerdi ǵylymı súıemeldeý arqyly elimizde ónimniń mol bolýy úshin qyzmet etýde. Barshańyzǵa málim, bizdiń aldymyzǵa mańyzdy mindetter qoıylǵan, onyń ishinde saladaǵy eńbek ónimdiligin eki jarym esege arttyrýǵa tıispiz. Aıta ketý kerek, aýyl sharaýashylyq salasyndaǵy eńbek ónimdiligi basqa salalarǵa qaraǵanda erekshe sanalady. Buǵan kóbinese tuqymnyń sapasy, tyńaıtqysh, ósimdikterdi qorǵaıtyn zattardyń sapasy jáne tehnologııalardy tolyǵymen qoldaný erekshe áser etedi. Ónimniń mol shyǵýy úshin ter tógetinderdiń biri – agrarlyq ǵylymdar. Klımat pen jerdiń jaǵdaıyna qarap ǵylymı negizdelgen boljam jasaıtyn ǵalymdar kóktemgi dala jumysy kezinde dıqanshylarmen qatar júrip eńbek etýde», - deıdi «Ulttyq agrarlyq ǵylymı-bilim berý ortalyǵy» KEAQ basqarma tóraǵasy Tóleýtaı Raqymbekov

Onyń aıtýynsha, bıyl kóktemgi dala jumystary bastalǵanǵa deıin topyraq jaǵdaıy, egistik túri men óńirdegi klımatty eskere otyryp «Ulttyq agrarlyq ǵylymı-bilim berý ortalyǵynyń» ǵalymdary 100-den astam usynym jasap, jergilikti organdardyń qoldaýymen fermerler arasyna taratty.

«Bıylǵy jyldyń ereksheligin eskere otyryp, dıqandar jumysyn ǵylymı súıemeldeý maqsatynda Ulttyq ortalyq josparlaǵan barlyq semınarlar vebınar jáne onlaın keńes túrine kóshirildi. Bizdiń ortalyq 30 naýryzdan bastap búgingi kúnge deıin aýyl sharýashylyǵy taýar óndirýshilerge 52 onlaın keńes ótkizdi. Atalǵan keńesterdiń úsheýi – halyqaralyq deńgeıde, shetel mamandarynyń qatysýymen, al 40 onlaın keńesti Ulttyq ortalyqtyń enshiles uıymdary ótkizdi. Bul onlaın sharalar 60 myńnan astam kórermendi qamtydy. Fermerler tarapynan qyzyǵýshylyq óte joǵary. Efır barysynda kelip túsken suraqtar saraptalyp, tıisti sala ǵalymdary nemese mınıstrlikke joldandy. Biz onlaın keńesti osy jyldyń 30 maýsymyna deıin úzbeı ótkizýdi josparlap otyrmyz. Barlyǵy 430-ǵa jýyq keńes ótkizbekshimiz. Onlaın keńester tikeleı efırde dúısenbi, sársenbi jáne juma kúnderi ótýde», - deıdi ol.