Agenttik áskerılerdiń bıýdjet qarajatyn jymqyrý shemasyn aıtty
14:31, 13 Aqpan 2020
NUR-SULTAN. QazAqparat - QR Sybaılas jemqorlyqqa qarsy is-qımyl agenttigi Preventsııa departamentiniń basshysy Anar Jarova QR Qorǵanys mınıstrligindegi jemqorlyq qylmystar týraly aıtyp berdi, dep habarlaıdy QazAqparat tilshisi.
«Qorǵanys mınıstrligi sybaılas jemqorlyqpen sottalǵan qyzmetkerleriniń sany boıynsha ortalyq memorgandar arasynda úshinshi orynda tur. 2019 jyly munda 28 laýazymdy tulǵa men áskerı qyzmetshi sottaldy», - dedi Anar Jarova agenttiktiń baspasóz ortalyǵynda ótken brıfıngte.
Onyń aıtýynsha, jaýapqa tartylǵan 28 qyzmetkerdiń 20-sy nemese 75% basqarýshy quram bolyp shyqqan.
«Kóp jaǵdaıda áskerı bólimderdiń qyzmetshileri jalǵan issaparlar men jeke quramǵa syıaqy berý, áskerı kıimder, janarmaı jáne basqa da múlikterdi esepten shyǵarý týraly jalǵan aktilerdi jasaý jolymen qarajat jymqyrǵan. Qalalyq jáne aýdandyq qorǵanys bólimderinde áskerı qyzmetke shaqyrýdy keıinge qaldyrý úshin para suralǵan», - dep atap ótti A. Jarova.