Aǵash zaýyty, qııar jylyjaıy, kondıterlik ónimder – SQO ınvestorlary qandaı jobalardy qolǵa aldy

<p>ASTANA. KAZINFORM &ndash; Soltústik Qazaqstan oblysynda ónerkásip salasynda 511 mlrd teńgege 34 ınvestıtsııalyq joba iske asyrylyp jatyr. Óńir ákimi Ǵaýez Nurmuhambetovtiń aıtýynsha, olardy iske asyrý 5 myńnan astam jumys ornyn qurýǵa múmkindik beredi.</p>

Ákimniń aıtýynsha, «Qyzyljar» arnaıy ekonomıkalyq aımaǵynda aǵash óńdeý klasteri qurylyp jatyr. Bul arqyly óńirdiń shamamen 3 500 turǵyny jumyspen qamtyldy.

− Túrik ınvestory aǵashty tereń óńdeý zaýytyn iske qosty. Kásiporyn jylyna 50 myń tekshe metrge deıin ónim shyǵarýdy josparlap otyr. Bul aǵash óńdeý ónimderi ımportyn 13%-ǵa almastyrýǵa múmkindik beredi. Munda otyndyq pelletter, DSP óndirisin, hımııalyq komponentter jáne jıhaz óndirýdi jolǵa qoıý josparlanyp otyr. Jalpy, klasterge 2027 jylǵa deıin 25 mlrd teńge ınvestıtsııa salynady, − dedi Ǵ.Nurmuhambetov Astanada Ortalyq kommýnıkatsııalar qyzmetinde.

Odan bólek, jyl basynda 4-shi býyndaǵy ınnovatsııalyq jylyjaı kesheni iske qosyldy. Jylyjaı ashylǵaly 1,3 myń tonna qııar satyldy. Munda kún saıyn 16 tonnaǵa deıin qııar jınalady. Jylyjaı óńir turǵyndarynyń qajettiliginiń úshten birin qamtamasyz etip, qys mezgilinde baǵanyń turaqtanýyna oń áserin tıgizedi.

«Qyzyljar» AEA aýmaǵynda Reseıdiń iri kondıterlik kompanııasy kondıterlik ónimder óndirý jobasyn júzege asyrýda. Investıtsııa kólemi 37 mlrd teńgeni quraıdy jáne 380 jańa turaqty jumys orny ashylady.

− «MasloDel» kompanııasynyń maı syǵatyn zaýyty da iske qosylý satysynda tur. Bul kásiporyn Ortalyq Azııa elderindegi eń iri zaýyt bolady. Kásiporyn qýaty jylyna 370 myń tonna maıly daqyldardy óńdep, 120 myń tonna daıyn ónim shyǵarýǵa múmkindik beredi. Zaýyt ónimniń 80% deıingi kólemin eksportqa shyǵaryp, qalǵan bóligin jergilikti naryqqa baǵyttaımyz, − dedi ákim.

Sonymen birge, otandyq ınvestor sańyraýqulaq ósiretin ferma men kompost zaýytyn salyp jatyr. Kásiporyn jylyna 1 200 tonna ónim ósirip, óńdeýdi josparlap otyr. Bul jergilikti halyqtyń qajettilikterin tolyqtaı qamtamasyz etýge múmkindik beredi.

Aıta keteıik, Orta Azııadaǵy eń iri sút fermasy da SQO aýdandarynyń birinde salynyp jatyr.

Sondaı-aq, SQO-da sońǵy 13 jyldaǵy eń mol egin jınaldy.