Aǵartýshy-ǵalym Muhtar Arynǵa eskertkish ornatyldy

TALDYQORǴAN. QazAqparat - Almaty oblysynda qoǵam qaıratkeri, pedagog-ǵalym, til janashyry Muhtar Arynnyń eskertkishi ashyldy, dep habarlaıdy QazAqparat tilshisi. 

Sarqan aýdanyndaǵy Baqaly aýylynda boı kótergen músindi ǵalymnyń urpaqtary «Bolashaqqa baǵdar: Rýhanı jańǵyrý» maqalasynyń «Týǵan jer» kishi baǵdarlamasy aıasynda ornatty.
Muhtar Aryn Jetisý óńiriniń tól perzenti. Ol keńestik kezeńde jabylyp qalǵan qazaq mektepterin el táýelsizdiginiń alǵashqy jyldarynda qaıta ashylýyna, jer-sý ataýlarynyń qazaqsha atalýyna úlesin qosty. Tarıh qoınaýynda qalǵan arystar men abyzdardyń eńbekterin zerttep, ony jaryqqa shyǵarýda ter tókti. «Til men dindi, tarıh pen dástúrdi, týǵan jerdi - bes anyq» dep toptastyrǵan ǵalym eńbekterin zııaly qaýym áli kúnge deıin zerttep keledi.
«Muqań ekeýimiz Almatyda 23 jasymyzda kezdestik. Tálim-tárbıe otbasynan bastalady ǵoı. Ekeýimizdiń bes balamyz bar. Úsh ulymyz, eki qyzymyz bar. Muqań bar ómirin bilimge, aǵartýshylyq salasyna arnap, ǵylym salasynda kóp eńbek etken jan. Ol 1983 jyldan ómiriniń sońyna deıin Aqtóbe pedagogıkalyq ınstıtýtynyń rektory boldy. Ol kisi ǵylymı jumysyn nemis tilinde Máskeýde qorǵaǵan. Osy qazaq elim rýhanı baı bolsa, órkenıetti el bolsa eken dep armandap ketti. Ol kisiniń júregi elim, jerim, tilim, dinim dep soqty. Biraq ómiri óte qysqa boldy. 59 jasynda ómirden ozdy. Oılaımyn bul eskertkish jas balalarǵa, urpaqtarǵa úlgi bolar. Keleshekte osy Muqańdaı jaqsy adam bolyp, adamgershiligi mol, parasatty, zııaly adam bolsyn», - dedi Muhtar Arynnyń jary Raıhan Berdiqojaqyzy.
«Muqań Baqalynyń, Sarqan aýdanynyń, Almaty oblysynyń Muqańy emes. Muhtar Aryn ol qazaqtyń tulǵasy. Muhtar Aryn ár jerge de qymbat. Muqań tek stýdentterdi tárbıelegen joq. Ol sol tusta qazaqtyń rýhyn tárbıeleýde úlken úles qosqan jan. Muqańnyń bir ereksheligi, ol nemis tiliniń mamany. Sondyqtan onyń boıynda qazaq órkenıetimen nemis mádenıeti birge júrdi. Ol Abaı men Geteni birdeı túsindi. Olardyń uqsastyqtaryn, olardyń búgingi ómirge degen yqpalynyń tereńdigin, sol ulttyq mádenıettiń tamyrynan úlken kúsh alǵandyǵyn aıtyp, halyqqa túsindirdi», - dedi eskertkishtiń saltanatty ashylýynda sóz sóılegen professor, zamandasy Amangeldi Aıtaly.
Muhtar Ǵalıuly kózi tiri bolǵanda 20 mamyrda 82 jasqa tolar edi. Aǵartýshy Almaty oblysynyń Sarqan aýdanyna qarasty Baqaly aýylynda jerlengen.