Aǵamdy soqqyǵa jyqty - Almaty polıtsııasy jelide tártip saqshylarynyń isine shaǵymdanǵandarǵa jaýap berdi

ALMATY. QazAqparat - Almatyda jazadan qutylamyn dep, polıtsııadan jasyrynyp júrgen qylmysker ustaldy, dep habarlaıdy QazAqparat tilshisi.

Jelide qala turǵyny quqyq qorǵaý organdarynyń qyzmetkerleriniń ústinen shaǵymdandy.

«Búgin bizdiń úıge belgisiz bireýler kirip ketti. Aǵam ekeýimizdi soqqyǵa jyqty. Tátem júgirip kelgen kezde, «opermyz» dep ózderin tanystyra bastady. Júgirip ákelip óz qujattaryn kórsetti. Olar aǵamdy soǵyp tastap, belgisiz jaqqa alyp ketti. Bul ne masqara? Olar qyzmettik mindetterin nege joǵary paıdalanady?» dep jazdy jeli qoldanýshysy.
Almaty polıtsııasy bótenniń múlkin urlaý oqıǵasyn zertteý aıasynda 2005 jyly týǵan Z. esimdi kúdiktiniń jeke basy anyqtalǵanyn habarlady. Ol jazadan qutylamyn dep, polıtsııadan jasyrynyp júrgen.
«Jedel-izdestirý is-sharasyn júrgizý kezinde kúdiktiniń jasyrynǵan úıi anyqtaldy. Ol ustaldy. Óziniń kinásin tolyq moıyndady. Qylmystyq is QR QK 188-baby boıynsha tergelýde. Urlanǵan múlik tárkilendi.
Qazirgi ýaqytta kúdiktiniń basqa da qylmystyq epızodtarǵa qatysqany tekserilýde», - dep habarlady Almaty qalalyq polıtsııa departamentiniń baspasóz qyzmeti.
Polıtsııada sondaı-aq kúdiktini men onyń týystaryn uryp-soǵý týraly aqparat shyndyqqa janaspaıtynyn málimdedi.
«Polıtsııa bólimshesine jetkizilgen kezde kúdikti medıtsınalyq kýálandyrýdan ótti. Onyń denesinde qandaı da bir dene jaraqaty bolǵan joq», - dep habarlady polıtsııada.