AES týraly referendýmnyń túpkilikti nátıjesi jarııalandy

<p>ASTANA. KAZINFORM &mdash; Ortalyq referendým komıssııasy aýmaqtyq referendým komıssııalarynyń hattamalary negizinde 2024 jylǵy 6 qazanda ótken respýblıkalyq referendýmnyń túpkilikti qorytyndysyn jarııalady.</p>

Keshe 7 qazanda referendým komıssııasynyń brıfınginde referendýmnyń aldyn ala nátıjesi jarııa etilgen edi.

«Referendýmǵa qatysý quqyǵy bar QR azamattarynyń jalpy sany – 12 mln 284 487 adamdy qurady. Olardyń 63,66 paıyzy nemese 7 820 204 daýys berýge qatysty. Osylaısha referendýmǵa qatysý quqyǵy bar azamattardyń jartysynan kóbi daýys berýge qatysty. Osylaısha, respýblıkalyq referendým týraly Konstıtýtsııalyq zań normalaryna sáıkes, referendým ótkizildi dep sanalady», - dedi Ortalyq referendým komıssııasynyń tóraǵasy Nurlan Ábdirov.

Daýys berýge qatysqan azamattardyń 71,12 paıyzy nemese 5 561 937 adam Qazaqstanda atom elektr stantsııasyn salý máselesin qoldady.

Al qarsy daýys bergender sany – 2 045 271 adamdy qurady.

«Jaramsyz dep tanylǵan bıýlletender sany – 130 267. Jaýaptardyń eki nusqasy da tańdalǵan, ıaǵnı jaramdy dep tanylǵan, biraq daýys sanaý kezinde esepke alynbaıtyn bıýlletender sany – 82 729 bıýlletendi qurady. Osylaısha, Qazaqstanda AES salý týraly referendýmda qoıylǵan másele boıynsha sheshim qabyldandy dep sanalady», - dedi N. Ábdirov.

Eske salaıyq, 6 qazan kúni qazaqstandyqtar atom elektr stantsııasyn salý máselesi boıynsha referendýmda daýys berdi.