AES salynǵanyn qoldaımyn – Energetıka mınıstri

ASTANA. QazAqparat – Energetıka mınıstri Almasadam Sátqalıev Úkimet otyrysynan keıin BAQ ókilderine bergen jaýabynda Qazaqstanǵa AES salý máselesin jaqtap daýys erýge ázir ekenin bildirdi, dep habarlaıdy QazAqparat tilshisi.

«Bul máselede sózsiz, dıalog jolǵa qoıylady. Parlament aldynda esep berýdi josparlap otyrmyz. Olardyń da atom energetıkasy týraly suraqtary kóp. Partııa atynan sóılep júrgen partııalar da bul máseleni kóterýde. Bul dıalogty barynsha keń aýqymda talqylaýǵa salamyz. Onyń ishinde qoǵamdy, qoǵamdyq pikir jetekshilerin tartamyz», - dedi mınıstr.

BAQ ókilderi: «AES salý máselesi boıynsha referendým ótkizý josparda bar ma?», - degen saýal qoıdy.

«Bul jerde zańnama talaptaryna qarap sheshim shyǵarý kerek dep oılaımyn. Atom elektr stansasyn salýdyń aıqyn tártibi bar, MAGATE-niń talaptary bar. Bizdiń bul máseleni sáıkestendirý baǵytyndaǵy talaptarymyz bar. Jergilikti ákimdikterde halyqpen talqylaý keńeıtilgen formattarda ótedi. Meniń jeke pikirim boıynsha, referendým halyqtyń basym bóligi stansa salýdy qoldaı ma, joq pa degendi túsiný úshin qajet. Halyqtyń pikirin túsinýdiń basqa da túrli tásilderi bar. Halyq qarsy bolsa, salmaıtynymyz túsinikti. Halyqtyń pikirin bilý sharasynyń formasy qandaı bolatynyn, referendým ba, álde qoǵamdyq tyńdaý bola ma, Parlament otyrysy bola ma, onyń bári tártip boıynsha retteledi.

Men AES salynǵanyn jaqtaımyn. Óz daýysymdy osy ustanymǵa kez kelgen formada berýge daıynmyn. Fýkýsıma oqıǵasynan keıin engizilgen qazir salynyp jatqan atom elektr stansalaryna qoıylatyn talaptar kúsheıdi», - dedi Almasadam Sátqalıev.