AES salý referendýmynda sanaly tańdaý jasaýǵa múmkindik alamyz — depýtat

<p>ASTANA. KAZINFORM &mdash; Májilis depýtaty Aıdos Sarym AES salý referendýmyna qatysty pikir aıtty.</p>

«Eń bastysy, Qazaqstan qoǵamy ózine qajet eń mańyzdy degen sheshimderge ózi tańdaý jasaıdy. Uzaq jyldar boıy bizde referendým ótkizilmegen edi. Jaqynda ǵana Konstıtýtsııany qabyldadyq (2022 jyly 5 maýsymda Qazaqstan Konstıtýtsııasyna ózgertýler men tolyqtyrýlarǵa arnalǵan referendým). Endi bıylǵy referendýmda atom elektr stantsııasyna qatysty sheshim qabyldamaqpyz. Bul sheshim — óte ózekti. Osy sheshimdi halyq júregimen qabyldaýy kerek sııaqty. Onyń artyqshylyǵyn da, kemshiliginde qatar túsinýi qajet. Sonda, sanaly tańdaý jasaýǵa múmkindik alamyz», — dedi A. Sarym Parlament palatalarynyń birlesken otyrysynan keıin tilshiler suraǵyna jaýap bere otyryp. 

Bul turǵyda depýtat qazir Úkimet referendýmdy ótkizý merzimin aıqyndaýy kerek ekenin aıtty. 

«Ekinshiden, tıisti shtab quryp, olar halyqqa barlyǵyn túsindirýi kerek. Óńirlerdiń kóbisinde kezdesýler boldy. Degenmen, aqparat áli de az dep sanaımyn», — dedi ol.

Budan buryn habarlanǵandaı, Prezıdent Qasym-Jomart Toqaev BAQ salasy qyzmetkerlerin marapattaý rásiminde sóılegen sózinde elde atom elektr stansasyn salý jobasy týraly pikir bildirdi. Atap aıtqanda, AES jónindegi referendým kúzde ótedi.