AES qurylysy: Qoǵamdyq tyńdaýda qaı máseleler qaralady

ASTANA. QazAqparat - Energetıka mınıstri Almasadam Sátqalıev elimizde AES salý múmkindigine qatysty suraqqa jaýap berdi, dep habarlaıdy QazAqparat tilshisi.

«Jalpy, qoldanystaǵy zańnamaǵa sáıkes, bul stantsııanyń qurylysyn salý tártibi belgilendi, memlekettik ortalyq jáne jergilikti organdardyń quzireti naqtylanǵan, sondaı-aq qoǵamdyq tyńdaýlar ótkizý protsedýralary, ýchaskeni anyqtaýǵa, sarapshylardy tartýǵa qatysty mehanızm bar. Biz konkýrs boıynsha tórt negizgi jáne eki qosymsha qatysýshynyń ótinimderin qarastyryp jatyrmyz. Olar barlyq osy rásimnen ótken jaǵdaıda, atom elektr stantsııasynyń qurylysy boıynsha konkýrsqa qatysýy múmkin», - dedi A. Sátqalıev Májiliste tilshiler suraǵyna jaýap bere otyryp.

Sonymen qatar ol qoǵamdyq tyńdaýsyz AES qurylysy bolmaıtynyn aıtty.

«Birinshiden, qoǵamdyq tyńdaýlar ótkizilip, onyń barysynda salynatyn alań belgilenedi. Sodan keıin qoǵamdyq tyńdaýlar negizinde bastapqy ázirleý qujattamasyna tıisti túzetýler engiziledi, qoǵamdyq tyńdaýlardaǵy jergilikti adamdardyń jáne jergilikti atqarýshy organdardyń usynystary eskeriledi», - dedi mınıstr.