AES qurylysy boıynsha másele referendýmǵa shyǵarylmaıdy - mınıstrlik

ASTANA. QazAqparat – Atom elektr stantsııasy boıynsha másele referendýmǵa shyǵarylmaıdy. Bul týraly QR Energetıka vıtse-mınıstri Jandos Nurmaǵanbetov aıtty, dep habarlaıdy QazAqparat tilshisi.

«Bul másele (AES qurylysy týraly) referendýmǵa shyǵarylmaıdy. Birinshi másele stantsııany ornalastyratyn jerge qatysty bolyp tur. Ekinshiden, tehnologııa men qarjylyq-ekonomıkalyq model mańyzdy taqyryp», - dedi Jandos Nurmaǵanbetov Senat otyrysynan keıin tilshiler suraǵyna jaýap bere otyryp.

Onyń aıtýynsha, qazir osy salada jumys isteıtin kompanııalardyń barlyǵy Qazaqstanmen yntymaqtastyqty damytýǵa talpynyp otyr. Atap aıtqanda, jaqynda kelissózderge Ońtústik Koreıadan ókilder kelgen. Sonymen qatar, Qytaı jaǵy da tıisti usynys jasaýy múmkin.

«Biz áli de AES salynatyn jer men qurylys jumystarynyń ýaqytyn naqtylaǵan joqpyz. Endi zańnamaǵa sáıkes qoǵamdyq tyńdaýlar eskerilgen. Bizge jańa mınıstr keldi jáne osy máselemen aınalysyp jatyrmyz», - dedi vıtse-mınıstr.