AES qurylysy boıynsha 6 halyqaralyq kompanııanyń usynysyn zerttep jatyrmyz – Mınıstrlik ókili

NUR-SULTAN. QazAqparat – QR Energetıka mınıstrligi atom energetıkasy jáne ónerkásibi departamentiniń dırektory Jaslan Qasenov AES salý boıynsha qandaı kompanııalardyń usynystary zerttelip jatqanyn aıtty, dep habarlaıdy QazAqparat tilshisi.

«Qazirgi tańda Qazaqstannyń tabıǵı-klımattyq faktorlary men AES-tiń qorshaǵan ortaǵa yqtımal áserin negizge ala otyryp atom energetıkasyn damytý jónindegi zertteýler júrgizilip jatyr. Usynyp otyrǵan 6 jetkizýshiniń jobalaryn zerttep jatyrmyz.

Bul amerıkalyq (NuScale), amerıkalyq-japonııalyq (GE-Hitachi), koreıalyq (KHNP), qytaılyq (CNNC), reseılik (Rosatom) jáne frantsııalyq(EDF) tehnologııalar», - dedi Jaslan Qasenov Ortalyq kommýnıkatsııalar qyzmetinde ótken brıfıngide.

Onyń málimeti boıynsha, bul baǵyttaǵy zertteý jumystary reaktorlardyń qaýipsizdigin de qamtymaq. Sondaı-aq, AES salynatyn oryn, reaktordyń qýaty jáne quny boıynsha zerdeleý júrgizilip jatyr.

«Bizdiń elimizde atom energetıkasyn damytýǵa barlyq múmkindikterimiz bar. Biz óndiriletin tabıǵı ýran kólemi boıynsha álemde birinshi oryn alamyz. Bizde ıadrolyq otyn komponentteriniń óndirisi bar. Sondaı-aq, bizdiń elde ýrandy ızotoptyq baıytý tehnologııasy bar deýge bolady. Byltyr Úlbi metallýrgııa zaýytynyń bazasynda Qytaıdyń atom elektr stantsııalaryna daıyn ıadrolyq otyn shyǵaratyn zaýyt ashyldy. Qazir onda ıadrolyq otyn belsendi óndirilip jatyr», - dedi mınıstrlik ókili.