AES qurylysynda halyqaralyq konsortsıým máselesi de pysyqtalýy múmkin – mınıstrlik

<p>ASTANA. KAZINFORM &ndash; Atom elektr stantsııasyn (AES) salyp bergen vendorǵa táýeldi bolyp qalmaý úshin ózimizdiń mamandardy daıarlaımyz. Bul týraly elordada ıadrolyq tehnologııalardyń halyqaralyq kórmesinde QR Energetıka mınıstrligi Atom energetıkasy jáne ónerkásibi departamentiniń dırektory Ǵumar Serǵazın aıtty.</p>

«Eger referendýmda AES salýǵa halyqtyń basym bóligi daýys berse, onda Úkimet deńgeıinde vendorlardy aıqyndaımyz. Bul turǵyda olarǵa qoıylatyn tıisti talaptar bolady, ıaǵnı tehnıkalyq ári ekonomıkalyq kórsetkishter nazarǵa alynady. Sonymen qatar, bul aýqymdy jumysqa jergilikti óndirister men jumys kúshiniń tartylýyna ekpin qoıylady. Atap aıtqanda, bizdiń mamandardyń bilimin jetildirýge kóńil bólinedi, sebebi keıinnen biz AES salyp bergen vendorǵa táýeldi bolyp qalmaýymyz kerek. Jalpy, elimiz otyn shıkizaty qory boıynsha aldyńǵy orynda ekeni belgili», - dedi A. Serǵazın.

Onyń aıtýynsha, búgin Astanada ótip jatqan kórmege Qazaqstanda AES salýdan úmitti tórt vendor shaqyrtyldy, ıaǵnı Frantsııa, Qytaı, Reseı jáne Ońtústik Koreıa kompanııalary bar.

«Bul vendorlardyń barlyǵy AES qurylysynda ózderin jaqsy jaǵynan tanyta aldy. Búgingi kórme aıasynda el halqy qandaı tehnologııalardy qarastyryp jatqanymyzdy óz kózimen kóre alady. Osynda zamanaýı reaktorlardyń úlgisi tanystyrylyp otyr», - dedi departament basshysy.

Onyń sózine qaraǵanda, AES qurylysyna 10 jyldan astam ýaqyt kerek.

«Bizde AES-ti basqara alatyn kadrlyq áleýet tapshy dep aıtýǵa bolmaıdy. Mınıstrlikke qarasty eki myqty ınstıtýt bar - ıAdrolyq fızıka ınstıtýty jáne Ulttyq ıadrolyq ortalyǵy. Budan bólek, elimizdegi basqa da joǵary oqý oryndaryn jyl saıyn jas tamandar támamdap jatyr», - dedi A. Serǵazın.

Budan bólek ol AES qurylysynda konsortsıým arqyly iske asyrý tıimdiligi pysyqtalyp jatqanyn aıtty.

«Halyqaralyq konsortsıýmdy da qarastyryp otyrmyz. Osy oraıda búgin qamtyǵan úmitker kompanııalardyń barlyǵynyń qatysýyn joqqa shyǵarmaımyz», - dedi departament basshysy Kazinform tilshisiniń suraǵyna jaýap bere otyryp.

Aıta keteıik, Qazaqstanda AES salý máselesine arnalǵan respýblıkalyq referendým týraly Prezıdent Jarlyǵynyń jobasy Úkimet qaraýyna jiberildi.