AEF strategııalyq sheshimderdi pysyqtaýdyń negizine aınalady

ASTANA. QazAqparat - Búgin QR Úkimetiniń baspasóz ortalyǵynda Global Challenges Summit 2018 HІ Astana ekonomıkalyq forýmyna daıyndyq barysy týraly AEF uıymdastyrý komıteti tóraǵasynyń orynbasary, QR ulttyq ekonomıka mınıstri Tımýr Súleımenov, GVA Kazakhstan seriktesiniń ókili Býlat Stolıarov, AEF uıymdastyrý komıtetiniń músheleri Baýyrjan Turlybekov jáne Dınara Joldaspaeva aıtyp berdi, dep habarlaıdy primeminister.kz.

Bıyl 17-19 mamyrda XI Astana ekonomıkalyq forýmy ótedi. T. Súleımenovtyń aıtýynsha, osy jyly forým jańartylǵan formatta ótip, jahandyq syn-tegeýrinder sammıtine aınalady.

Uıymdastyrý komıteti tóraǵasynyń orynbasary sharanyń mazmundyq, uıymdastyrýshylyq tustary jaıynda aıta otyryp, BAQ ókilderi qyzyǵýshylyq tanytqan suraqtarǵa jaýap berdi.

Global Challenges Summit 2018 Astana ekonomıkalyq forýmy jahandyq deńgeıde de, naqty elimiz úshin de ózekti strategııalyq sheshimderdi pysyqtaýdyń negizine aınalady.

«AEF-tiń bıylǵy basty maqsaty - sarapshylar qaýymdastyǵyn, tehnologııalyq elıtany, memlekettik basqarý ókilderin, iri korporatsııalardyń kóshbasshylaryn jáne vızıonerlerdi jahandyq deńgeıdegi mazmundy jaýaptar men sheshimderdi tabýǵa arnalǵan alańmen qamtamasyz etý», - dedi AEF uıymdastyrý komıteti tóraǵasynyń orynbasary T. Súleımenov.

Forýmda jahandyq damýdyń ózekti máseleleri: tsıfrlandyrýdan bastap jańa format adamyna deıin, krıptovalıýtadan bastap robotty almastyrylǵan adamzatqa deıin, álemdik ekonomıkadan jańa taza energııaǵa deıingi máseleler talqylanady.

T. Súleımenovtyń aıtýynsha, búgingi tańda forýmnyń tujyrymdamalary jasalǵan.

«Forýmnyń baǵdarlamasy bekitilgen, ol resmı saıtta qoljetimdi. Oǵan 500-ge jýyq qonaq pen spıker keledi dep kútilýde, olardyń deńgeıi men statýsy Forýmnyń kún tártibindegi joǵary deńgeıge barynsha sáıkes keledi», - dedi T. Súleımenov.

AEF uıymdastyrý komıteti tóraǵasynyń orynbasary AEF ókildigin erekshe atap ótti. Buǵan deıin aıtylǵan qonaqtar tizimine Apple kompanııasynyń teń quryltaıshysy Stıv Voznıak sekildi esimder qosyldy. Forýmnyń taǵy bir qonaǵy Estonııadaǵy tanymal tsıfrlyq revolıýtsııaǵa bastamashy bolyp, júzege asyrǵan - Tomas Ilves bolady.

Bıyl forým úsh kúnge sozylady. Úshinshi kún tolyǵymen forýmnyń alǵashqy kúnderinde talqylanǵan ıdeıalar men sheshimderdi qazaqstandyq kún tártibine beıimdeýge jáne olardy talqylaýǵa arnalady.

«Qazaqstannyń ulttyq jáne korporatıvtik deńgeılerde ǵalamshardyń jahandyq syn-tegeýrinderiniń sheshimin tabý jónindegi halyqaralyq pikirtalastardyń nátıjelerin eń tıimdi jolmen paıdalanýǵa nıetti ekenin atap ótkim keledi. Strategııalyq sessııa dep ataǵan úshinshi kúnniń qorytyndysy boıynsha biz halyqaralyq sarapshylardan elimiz úshin qundy tájirıbelik usynystar kútemiz», - dedi T. Súleımenov.

T. Súleımenov Forýmnyń Qazaqstanǵa tıgizer paıdasy týraly jýrnalısterdiń suraqtaryna jaýap bere otyryp, buǵan deıin AEF usynystary kóbinese ekonomıkalyq, qarjylyq saıasatqa qatysty bolsa, Forýmnyń bıylǵy taqyryby adam kapıtalyn damytý, jańa tehnologııalardy jetildirý jáne t.b. salalardy qamtyp, tolyq kólemde ulttyq strategııa men taktıkany qalyptastyrýǵa múmkindikter ashýǵa baǵdarlanatynyn túsindirip ótti.

«2018 jylǵy Astana ekonomıkalyq forýmynyń aıryqsha ereksheligi osy», - dep túıindedi T. Súleımenov.