AEF óziniń aýqymyn keńeıtip keledi - Euronews ókili
Aıta keteıik, AEF-2019 aıasynda Sh. Grobe QR Tuńǵysh Prezıdenti - Elbasy Nursultan Nazarbaev pen QR Prezıdenti Qasym-Jomart Toqaevtyń qatysýymen ótken plenarlyq otyrysta moderator boldy.
«Birazdan jyldan beri Astana ekonomıkalyq forýmyna kelip júrmin. Sońǵy ret 2013 jyly moderator retinde kelgen edim. Qazaqstan elordasy ár jyl saıyn ózgerip turady, jańa ǵımarattar paıda bolýda. Atap aıtqanda, bul forým bilikti mamandardyń basyn qosyp, pikir almasýǵa jaqsy múmkindik jasap otyr», - dedi ol.
Onyń paıymynsha, AEF álem elderi men Qazaqstan úshin mańyzdy.
«Máselen, memlekette teńizge shyǵýǵa múmkindik bolmasa, jahandyq naryqta tıisti qıyndyqtar týyndaıdy. Qazirgi kezde Qazaqstanda saıası turaqtylyqtyń deńgeıi óskenin bilemiz. Qytaı men Reseıdiń kórshisi retinde sizder bir deńgeıde dıplomatııalyq kartada turaqtaýǵa qaýqarly boldyńyzdar. AEF-ke kelgen kezde, osy mamandar óz elderinde forýmnyń qalaı ótkenin, onda talqylanǵan ózekti máseleler týraly pikir bildiredi. Bul rette ekonomıkalyq forýmdy ótkizgen elge túrli salalar boıynsha ońtaıly yqpal etedi», - dedi Euronews telearnasynyń ókili.
Forýmdy uıymdastyrý máselesine toqtalǵan ol, AEF-2019 joǵary deńgeıde ótip jatqanyn, barlyq sharalar egjeı-tegjeıli pysyqtalǵanyn jetkizdi.
«Qatysýshylar aldyńǵy qatarly elderden keldi. Forýmnyń plenarlyq otyrysynda óte qyzyqty pikir almasý boldy. Qazaqstan Táýelsiz el atanǵan kezde, kórshi memlekettermen bir deńgeıde bolǵan edi. Qazirgi kezde barlyǵy ózgerdi. Jalpy, Astana ekonomıkalyq forýmy el úshin mańyzdy oqıǵa dep bilemin. 10 jyldan astam ýaqyt boıy ótkizilgen bul forým óziniń aýqymy men deńgeıin keńeıtip keledi. Túrli sıpattaǵy problemalar talqylaýǵa negiz boldy. Osy pikir almasýlar ońtaıly nátıje beretini anyq», - dedi ol.