AEF: eBay dúkeni arqyly Ákim Tarazıdiń kelisiminsiz onyń 1 mln.-nan astam kitaby satyldy

STANA. 24 mamyr. QazAqparat - Electronic Bay iri ınternet-dúkeni arqyly Qazaqstannyń belgili jazýshysy Ákim Tarazıdiń 1 mıllıonnan astam kitaby avtordyń ruqsatynsyz satylǵan.

Bul týraly búgin AEF aıasynda ótip jatqan «Zııatkerlik menshik quqyqtaryn ınternet jelisinde qorǵaý: máseleleri men keleshegi» paneldik sessııasynda Ádilet vıtse-mınıstri Záýresh Baımoldına aıtty.

«Avtorlardyń quqyn buza otyryp, ınternet-dúkender arqyly kontrafaktilik ónimder saýdalanyp jatady. Máselen, electronic Bay (eBay) ınternet-dúkeni arqyly qazaq ádebıetiniń áıgili klassıgi, 2011 jylǵy Frants Kafka medaliniń laýreaty Ákim Tarazıdiń ónimderi taratylýda. Tek atalǵan ınternet-dúken 1 mıllıonnan astam kitap danasyn saýdalaǵan. Bul kitap eki jyldan astam ýaqyttan beri satylymda ekenine qaramastan jáne osy týyndy Qazaqstannan basqa Ulybrıtanııa, AQSh, Qytaı, Avstralııada, sondaı-aq afrıkalyq memleketterde suranysqa ıe bola tura, Á.Tarazı akkaýnt avtory kim ekenin bilmegendikten ózine tıesili syıaqyny almaı qaldy»,-dep naqtylady vıtse-mınıstr.

Onyń aıtýynsha, keıin avtordyń kitabyn basqany úshin Ulybrıtanııanyń baspasy aıtarlyqtaı emes somadaǵy qarjyny aýdarýdy moınyna alǵan.