AEF: EAEO men Qytaı arasyndaǵy kelisimniń sharttary qandaı

ASTANA. QazAqparat - Eýrazııalyq ekonomıkalyq odaq alqasynyń tóraǵasy Tıgran Sarkısıan EAEO men Qytaı arasyndaǵy kelisimniń negizgi sharttary týraly aıtyp berdi. Atalǵan qujat saýda-ekonomıkalyq yntymaqtastyqty damytýdy kózdeıdi, dep xabarlaıdy QazAqparat tilshisi.

«Kelisimniń basty talaby - ashyqtyq. Osy oraıda biz ekijaqty saýda sattyqqa kedergi bolatyn jaǵdaılardyń notıfıkatsııasyn, ıaǵnı ondaı tosqaýyldar týyndaǵanda bir-birimizdi aldyn ala eskertýge kelistik. Mınıstrlikter deńgeıinde arnaıy komıtet qurylady. Ol da - kelisimniń mańyzdy sharty. Al bıznesmender úshin aqparattyq ortalyqtardy qurý josparlanyp otyr. Sondaı-aq, barlyq elderdiń keden qyzmetkerleri birlesip jumys isteıtin bolady», - dedi T.Sarkısıan Astana ekonomıkalyq forýmy aıasyndaǵy paneldik sessııada.

Onyń aıtýynsha, shekarada taýardy uzaq ustap tursa, ol eldiń quziretti organdary óz sheshimin mindetti túrde túsindirýi tıis. Al elektrondy saýda salasynda tutynýshylardyń jeke málimetterin saqtaý qaǵıdattary engizildi. Zııatkerlik quqyqtar da qatań saqtalýy shart.

«Jalpy, aýyl sharýashylyǵy, energetıka, kólik, óndiris, texnologııalar, ınnovatsııalar, aqparattyq-texnologııalyq ınfraqurylym, qarjy men qorshaǵan orta salasynda ózara yntymaqtastyqty damytýǵa basymdyq beriledi. Qazirdiń ózinde biz qytaılyq áriptesterge kólik salasy boıynsha 40 jobany qarastyrýdy usyndyq», - dep atap kórsetti T.Sarkısıan.

Kelisimde kedendik jeńildikter qarastyrylmaǵan. Negizgi maqsat - ekijaqty yntymaqtastyqty nyǵaıtý, qarym-qatynastyń naqty joldaryn belgileý, ortaq jobalar úshin tıimdi jaǵdaı jasaý.

Aıta keteıik, búgin Eýrazııalyq ekonomıkalyq odaq elderi men Qytaı Halyq Respýblıkasy saýda-ekonomıkalyq yntymaqtastyq týraly kelisimge qol qoıdy.