AEF aıasynda T. Mansurovtyń «N. Nazarbaevtyń ómirde júzege asqan eýrazııalyq jobasy» kitabynyń tusaýkeseri boldy

ASTANA. 22 mamyr. QazAqparat - Búginde jumys istep otyrǵan Eýrazııalyq ekonomıkalyq qaýymdastyq, Kedendik odaq jáne qalyptasa bastaǵan Birtutas ekonomıkalyq keńistik Prezıdent Nursultan Nazarbaev jobasynyń ómirde naqty iske asyrylýynyń jarqyn kórinisi bolyp tabylady.

Bul týraly búgin VI Astana ekonomıkalyq forýmy sheńberinde ótken EýrAzEQ Bas hatshysy Taıyr Mansurovtyń «N. Nazarbaevtyń ómirde júzege asqan eýrazııalyq jobasy» kitabynyń aǵylshyn tilindegi nusqasynyń tusaýkeserinde kitaptyń avtory aıtty.

Bul kitapta alǵash ret Qazaqstan Respýblıkasynyń Prezıdenti N.Á. Nazarbaevtyń 1994 jylǵy naýryzda M.V. Lomonosov atyndaǵy MMÝ-de usynǵan Eýrazııalyq jobasynyń júzege asyrylýy qujattyq negizde jan-jaqty ashyp kórsetilgen.

«Monografııanyń avtory kórnekti qazaqstandyq saıasatker jáne dıplomat, Eýrazııalyq ekonomıkalyq qaýymdastyqtyń Bas hatshysy, saıası ǵylymdar doktory Taıyr Mansurov Nursultan Nazarbaevtyń Eýrazııalyq jobasynyń postkeńestik elderdiń aldynda jańa múmkindikter men kemel keleshek ashatyn tıimdi ekonomıkalyq jáne áleýmettik damýdyń ózekti quraly retindegi tarıhı rólin júıeli túrde taldap kórsetken», - dep atap ótti baspasóz máslıhatyn júrgizgen QR Syrtqy ister mınıstriniń orynbasary Qaırat Sarybaı.

Basylym kópshilik oqyrmanǵa, ǵalymdarǵa, memlekettik basqarý men halyqaralyq qatynastar salasynyń mamandaryna jáne osy zamanǵy tarıh máselelerimen qyzyǵatyn jalpy oqyrmanǵa arnalǵan.

Kitap «Prezıdent N.Á. Nazarbaev - qazirgi Qazaqstannyń negizin qalaýshy», «Eýrazııashyldyqtyń fılosofııasy: eýrazııashyl fılosoftardyń ıdeıalary men ıdeologııasynyń praktıkalyq áleýeti», «Nursultan Nazarbaev - osy zamanǵy eýrazııashyldyq ıdeıanyń avtory. Eýrazııalyq Memleketter Odaǵyn qalyptastyrý jobasy» jáne basqa da taqyryptarǵa arnalǵan 7 taraýǵa bólingen. Kitaptyń orysshasy men qazaqsha nusqalary byltyr oqyrmanǵa jol tartqan bolatyn.