AEF aıasynda alǵash ret «Jasyl» ekonomıkaǵa ótý negizderi» taqyrybynda paneldik sessııa ótedi
Sessııany QR Ekonomıka jáne bıýdjettik josparlaý mınıstrligi Ekonomıkalyq zertteýler ınstıtýty, Ortalyq Azııanyń ornyqty damý sarapshylarynyń jelisi (NESDCA), Azııa men Tynyq muhıty úshin Ekonomıkalyq jáne Áleýmettik komıssııa (UN ESCAP) men AQSh halyqaralyq damý agenttiginiń Ortalyq Azııadaǵy mıssııasy (USAID) uıymdastyrady. Bul týraly AEF baspasóz qyzmetinen habarlandy.
Sessııanyń maqsaty - halyqaralyq tájirıbeni talqylaý, eldik «jasyl» baǵdarlamalardy damytý negizinde «jasyl» ekonomıka múddesine qaraı eldik deńgeıde de, sýbóńirlik deńgeıde ǵylymı zertteýler men oqý-aǵartý salasyn keńeıtý boıynsha usynymdar ázirleý. Shara barysynda basqarýdyń «jasyl» prıntsıpterin ilgeriletýde oqý-aǵartý men ǵylymnyń róli, «Jasyl» órkenıetke ótýdiń eldik modelderi, ornyqty ekonomıkalyq damýdyń ınnovatsııalyq modelderin zertteý quraldary men ádisteri sekildi máseleler talqylanbaq. Budan bólek, «Jasyl» ekonomıkany qalyptastyrý maqsatyndaǵy jarnama, marketıng, PR, eldik jáne sýbóńirlik deńgeıde ekologııalyq oqý-aǵartýdy uıymdastyrýdaǵy júıelik tásil taqyryptary qaralady.
Sessııa jumysyna «Eýrazııa ekonomıkalyq ǵalymdar klýby» Qaýymdastyǵynyń Úılestirý keńesiniń tóraǵasy, Qazaqstan Respýblıkasy Prezıdenti Ákimshiligi Basshysynyń orynbasary Baqyt Sultanov, Klımatty zertteý salasynda Nobel syılyǵynyń laýreaty, ESKATO Qorshaǵan orta men damý departamentiniń dırektory, doktor Roı Kvan Chýng, «Úlken Eýrazııa ýnıversıtet kesheni» AKU prezıdenti, Oral memlekettik ekonomıkalyq ýnıversıtetiniń rektory, professor Mıhaıl Fedorov, áleýmettik polıarlaýdy zertteý, qalalar men TKSh damytý salasyndaǵy jetekshi brıtan sarapshysy, London ýnıversıtetiniń Koroldik kolledjiniń professory Krıs Hamnett, Ulttyq ǵylymdar akademııasynyń prezıdenti, Mońǵolııanyń Qorshaǵan orta jáne jasyl damý mınıstriniń keńesshisi, professor Adıasýren Tsohıo, Ortalyq Azııadaǵy USAID Mıssııasynyń ekonomıkalyq damý bóliminiń dırektory, doktor Maıkl Trýblad qatysady dep josparlanǵan.
Sessııanyń moderatory - Qazaqstannyń strategııalyq josparlaý júıesine «jasyl ósim» prıntsıpterin kiriktirý jónindegi Birinshi Ulttyq eseptiń úılestirýshisi, «Ortalyq Azııanyń ornyqty damý sarapshylarynyń jelisi» RQB prezıdenti, ekonomıkalyq zertteýler salasyndaǵy AEF-4 birinshi syılyǵynyń laýreaty, professor Baqyt Esekına. Sessııa qorytyndysy boıynsha Qazaqstan Respýblıkasynyń Úkimeti men «Úlken jıyrmalyq» elderi úshin usynymdar qabyldaıtyny josparlanady. Sondaı-aq «jasyl» ekonomıka ádisnamasyn ázirleý, «jasyl» bıznesti, ekologııalyq ınfraqurylym men nasıhatty damytý salasyndaǵy oqý-aǵartý, bilim berý júıesin jetildirý men ǵylymı zertteýler júrgizý maqsatynda Memorandýmdarǵa qol qoıylady dep kútilýde.