AEF-2018: Reseıdiń ulttyq krıptovalıýtasy bolady
Onyń aıtýynsha, Reseı krıptovalıýtaǵa qatysty zańdy qabyldaýǵa asyqpaı otyr. Sebebi osy salada birqatar texnıkalyq máselelerdi retteý kerek. Áıtpese, tsıfrlyq aqshanyń urlyǵyna jol ashylady.
«Qazirgi kezde Reseıdiń krıptografııa akademııasy ǵylymdar akademııasymen birlese otyryp, krıptovalıýtanyń qaýipsizdik máselesin jan-jaqty zerdelep jatyr. Krıptovalıýtalyq aýdarymdardy qalaı qorǵaýǵa bolady? Shyn máninde, atalǵan júıeniń osal bir tusy bar. Krıptografııalyq qoltańbanyń kodyn urlasa, aqshany da úptep ketýge bolady. Sondyqtan dál osy texnıkalyq máselelerdiń bárin eskerý kerek», - dedi M.Senatorov AEF-2018 paneldik sessııasynda.
Onyń aıtýynsha, búginde krıptovalıýtalar kóp. Bári ózderiniń jeke tsıfrlyq aqshasyn shyǵarýǵa tyrysady. Al onyń barlyǵyn baqylap otyrý múmkin emes.
«Sol sebepti ulttyq krıptovalıýtany jasap shyǵarǵan tıimdi. Sonda barlyq normalardy zań júzinde bekitip, tıisti qorǵaý sharalaryn júrgizýge bolady. Árıne, Ortalyq bank ol krıptovalıýtany rettep otyrýy qajet. Menińshe, qazirgi jumystardyń nátıjesinde Reseıdiń ulttyq krıptovalıýtasy jasalady. Ortalyq bank kádimgideı aqshany qalaı rettese, jańa tsıfrlyq aqshany da solaı retteıtin shyǵar», - dep atap kórsetti M.Senatorov.
Buǵan deıin reseılik BAQ-tardyń habarlaýynsha, prezıdent Vladımır Pýtın úkimet pen Ortalyq bankke krıptovalıýtanyń maınıngine zańnamalyq negizde talaptardy ázirleýdi tapsyrdy. Tapsyrma 2018 jyldyń 1 shildesine deıin oryndalýy tıis.
Eske salaıyq, Astana ekonomıkalyq forýmynyń jalpy otyrysynda sóz sóılegen Prezıdent Nursultan Nazarbaev krıptovalıýtalar fenomeni men blokcheın tehnologııalary bankterdi qamtı otyryp, qarjy naryǵy úshin túbegeıli ózgeristerdi alyp keletinin aıtqan bolatyn.