Advokattyq qyzmettiń baǵasy ashyq jarııalanady

ASTANA. QazAqparat - QR Parlament Senatynyń qaraýynda jatqan zań jobasynda advokattardyń tarıfterin retteý máselesi bar. Atalǵan usynys damyǵan memleketterdiń tájirıbesi negizinde ázirlendi, dep xabarlaıdy QazAqparat tilshisi.

QR Ádilet mınıstri Marat Beketaevtyń aıtýynsha, advokattar qyzmetiniń qymbat bolýyna birneshe sebep bar. Bastysy - osy sanattaǵy mamandardyń tapshylyǵy. Máselen, Reseıde bir advokatqa 1 900 adam keledi. Al Qazaqstanda bir advokat 3 900 adamǵa qyzmet kórsetedi. Sol sebepti qymbatshylyq baıqalady. «Senatta jatqan zańda biz bylaı jazdyq, advokattar jyl saıyn óz qyzmetiniń baǵasyn anyqtap, resmı saıttaryna jarııalaıtyn bolady. Sonda tutynýshylar ortasha baǵany bile alady. Osy saladaǵy tájirıbe AQSh-ta, Ulybrıtanııada, sondaı-aq, Eýropa elderinde bar», - dedi M.Beketaev xalyqqa esep berý kezdesýi kezinde.

Mınıstrdiń sózine qaraǵanda, advokattarǵa da birqatar jeńildikter beriledi. Atap aıtqanda, aldaǵy ýaqytta Advokattar palatasyna tólenetin jarnalardy múldem alyp tastaý josparlanǵan. Atalǵan másele de zańda kórsetilgen.

Aıta keteıik, kezdesý kezinde mınıstr sot oryndaýshylarynyń qyzmetine qatysty zań jobasynyń Parlamenttiń qaraýynda jatqanyn jetkizdi.  Budan bólek, Bas zańger páter satyp alamyn deýshilerge keńes berdi.