Advokattar tórelik sottardaǵy daýlarǵa qatysa alatyn bolady

ASTANA. QazAqparat - Advokattar tórelik sottardaǵy daýlarǵa qatysa alatyn bolady. Bul týraly búgin Senattyń Konstıtýtsııalyq zańnama, sot júıesi jáne quqyq qorǵaý organdary komıtetiniń keńeıtilgen otyrysynda Ádilet vıtse-mınıstri Záýresh Baımoldına málim etti. Eske salaıyq, komıtette «Tórelik sottar týraly» zań jobasy talqylanǵan bolatyn.

Atalǵan qujat tórelik sottar qyzmetine jańa ádisterdi engizýdi qarastyrady. Atap aıtqanda, tórelik sottar kelisiminiń derbes qaǵıdasy bekitiledi, sonymen birge, qupııalylyq qaǵıdaty boıynsha áreket etý aýqymy keńeıtiledi. Budan bólek, tórelik sottardyń biliktilik talaptary naqtylanady. Osyǵan oraı, Qazaqstanda tórelik sottar palatasyn qurý sharasy da kózdeledi. Ondaı ınstıtýttyń qurylýy tórelik sottar qyzmetin júzege asyrý úshin quqyqtyq, ekonomıkalyq jáne áleýmettik jaǵdaılardy qamtamasyz etedi.

«Tórelik sottar qyzmetin jetildirý maqsatynda osy salany zerdeleı túsý úshin ǵylymı-tájirıbelik sharalar kesheni júzege asyrylatyn bolady. Tórelik sottardyń sapalyq quramyn qaıta qaraý, oqytý semınarlary arqyly olardyń biliktiligin kóterý qamtamasyz etiledi. Taǵy bir mańyzdy jańalyq, zań jobasy boıynsha advokattyq qyzmet týraly qoldanystaǵy zańǵa túzetý engiziledi. Osy arqyly biz advokattarǵa tórelik (arbıtrajdyq) sottaǵy daýlarǵa qatysýdy usynatyn bolamyz. Bunyń aıasynda olar arbıtr bola alady. Jalpy qoldanystaǵy zańda olarǵa qatysty tikeleı tyıym salý joq. Alaıda, osyndaı norma bolmaǵandyqtan, advokattar bundaı iske qatyspaı kelgen bolatyn», dedi vıtse mınıstr Z. Baımoldına.

Zań jobasy palatanyń aldaǵy ýaqytta ótetin jalpy otyrysyna shyǵarylady.