Advokattar alqasyna kirý úshin mıllıon teńge tólenedi - Serik Aqylbaı

ASTANA. QazAqparat - Qazaqstanda advokat jetispeıdi. Bul týraly búgin elordada ótip jatqan «Qazaqstan Respýblıkasyndaǵy zańgerlik kásipti retteýdiń ózekti máseleleri» taqyrybyndaǵy halyqaralyq konferentsııada «Qazaqstan zańgerleri odaǵy» RQB tóraǵasynyń mindetin atqarýshy Serik Aqylbaı aıtty, dep habarlaıdy QazAqparat.

«Qazirgi ýaqytta bizde 4 myń adamǵa bir advokattan keledi. Bul Eýropada emes TMD elderindegi eń tómengi kórsetkish. Italııada 360 adamǵa bir zańgerden keledi. Al Germanııada 500, Ulybrıtanııa 900 adamǵa bir zańgerden. Statıstıka kórsetip otyrǵandaı sońǵy 4 jylda advokattar sany 300 adamǵa ósken bul aıtarlyqtaı ósim emes», - dedi Serik Aqylbaı.

Onyń aıtýynsha, Qazaqstanda advokat bolý úshin zańgerlik bilim, advokattar alqasynan alty aıdan bir jylǵa deıin taǵylymdamadan ótý, attestatsııa jáne advokattar alqasyna jarna tóleý qajet. Taǵylymdamadan ótý quny 140 myńnan 280 myń teńge aralyqtaǵy qarjyny quraıdy. Al alqaǵa kirý úshin bastapqy soma óńirge baılanysty 800 myń teńgege deıin bolady. Osylaısha advokattar alqasyna kirý birneshe kezeńnen quralyp, ortasha eseppen mıllıon teńge shyǵyndalady.

«Advokattar alqasyna kirý úshin árbir adam mıllıon teńge bere almaıtyndyǵymen kelisetin shyǵarsyzdar. Munan keıinge advokattar alqasyna tólinetin jarna 5- ten 10 aılyq eseptik kórsetkishti quraıdy. Almatyda shamamen 762 advokat bar. 10 AEK kólemindegi aılyq jarna 22690 teńge. Aıyna osylaısha 17 mln teńge jınalady. Al bul aqsha qaıda ketedi? Ashyqtyq joq», - dedi Serik Abylbaı. 

Aıta keteıik, elordada «Qazaqstan Respýblıkasyndaǵy zańgerlik kásipti retteýdiń ózekti máseleleri» taqyrybynda halyqaralyq konferentsııa ótýde. Shara barysynda qatysýshylar elimizdiń Ádilet mınıstrligi ázirlegen «Advokattyq qyzmet jáne zańgerlik kómek týraly», «Advokattyq qyzmet jáne zańgerlik kómek máseleleri boıynsha keıbir zańnamalyq aktilerge ózgerister men tolyqtyrýlar engizý týraly» zań jobalaryn talqylaýda.