Advokattar alqasyna 800 myń teńge tólep kirý tártibi alynyp tastalmaq

ASTANA. QazAqparat - QR Ádilet mınıstrligi Tirkeý qyzmeti jáne zań qyzmetin uıymdastyrý departamentiniń dırektory Baqtygúl Ataǵazıeva advokattar alqasyna ený úshin tólenetin 800 teńgelik alǵashqy jarnany alyp tastaýdyń artyqshylyqtary týraly aıtyp berdi, dep habarlaıdy «QazAqparat» HAA tilshisi.

Qazirgi qoldanystaǵy zań boıynsha advokat bolǵysy kelgen joǵary bilimdi zańger mindetti túrde advokattar alqasyna ený úshin 800 myń teńge tóleýi tıis. Demek, bul jarnany tólemese ol advokattyq qyzmetti atqara almaıdy. Al jańadan ázirlenip jatqan «Advokattyq qyzmet jáne zań kómegi týraly» zań jobasy bul jarnany alyp tastaýdy kózdep otyr.

«Advokat bolǵysy kelgen adam joǵary zań bilimimen 6 aıdan 1 jylǵa deıin taǵylymdamadan ótýi kerek. Onyń quny 140-280 myń teńgege deıin barady. Odan keıin óziniń biliktilik talaptaryna sáıkestigin tekserý úshin ol attetatsııadan ótýi tıis. Osydan keıin ol Ádilet mınıstrliginiń lıtsenzııasyn alyp, advokattar alqasyna múshelikke enýi kerek. Bul mindettti talap. Múshelikke kirmeı ol QazaqstanRespýblıkasynyń aýmaǵynda advokattyq qyzmet atqara almaıdy. Al múshelikke kirý úshin 800 myń teńgege deıin jarna tóleýi kerek. Bul bizdińshe, naqty osy salaǵa enýdiń bir kedergisi. Sondyqtan, ony alyp tastaýdy usynyp otyrmyz», - deıdi Baqtygúl Ataǵazıeva.

Departament dırektorynyń aıtýynsha, notarıýstardan alǵashqy jarna 2011 jyly alynyp tastalǵan. Zań keńesshilerinde de alǵashqy jarna joq.

«Bul qadam advokattardyń sanyn arttyryp, olardyń arasyndaǵy ózara básekelestikti kúsheıte túsedi. Olardyń kásibılik deńgeıin arttyrýǵa múmkindik beredi», - deıdi departament dırektory.