Advokat ÓKM operatoryna qatysty sot protsesinde foto jáne vıdeo túsirýge tyıym salýdy surady
«Buqaralyq aqparat quraldaryna A.Pirimqulovtyń sýretin jáne vıdeosyn túsirýge jáne ony BAQ betterinde jarııalaýǵa tyıym salýdy suraımyz», - dedi advokat Álimǵojına sot otyrysy barysynda.
Qorǵaýshy tyıym salynbasa, onda bul aıyptalýshynyń kámeletke tolmaǵan balalary úshin teris áser etýi múmkin ekenin alǵa tartty. Osy is boıynsha aıyptalyp jatqan «ÓKM Operatory» JShS eks-Basqarma tóraǵasy Medet Qumarǵalıev te atalǵan talapty qoldady.
«Men advokat Álimǵojınanyń usynysyn qoldaımyn. Sondaı-aq sot otyrysynda jáne odan tys jerlerde meni sýretke túsirmeýin suraımyn. BAQ-qa qatysty mende basqa qarsylyq joq. Sot otyrysyna qatysa bersin», - dedi Medet Qumarǵalıev.
Atalǵan másele boıynsha sheshim shyǵarý beısenbi, ıaǵnı 20 sáýirde ótetin sot otyrysyna qaldyryldy.
Eske salaıyq, búgin elordada «ÓKM Operatory» JShS-ge qatysty basty sot talqylaýy bastaldy.
Sybaılas jemqorlyqqa qarsy is-qımyl agenttiginiń málimetinshe, «ÓKM Operatory» basshylyǵy sheneýniktermen birlesip, 180 mlrd teńge jymqyrmaq bolǵan. Osyǵan baılanysty 26 qańtarda QR Ekologııa jáne tabıǵı resýrstar vıtse-mınıstri Ahmetjan Pirimqulov pen «ÓKM Operatory» JShS Basqarma tóraǵasy Medet Qumarǵalıev ustalǵan bolatyn.
Sol kúni «ÓKM Operator» JShS-niń basqarýshy dırektory Rýslan Shámshıevtiń denesi tabylyp, elordanyń «Esil» aýdandyq polıtsııa bólimi QR Qylmystyq kodeksiniń 105-babymen (Ózin-ózi ólitýrge deıin jetkizý) qylmystyq is qozǵady.
Aıta keteıik, 2022 jylǵy 11 qańtarda QR Parlamenti Májilisiniń otyrysynda sóılegen sózinde Memleket basshysy Qasym-Jomart Toqaev «ÓKM Operatory» JShS-niń kádege jaratý alymyn júrgizý jáne kádege jaratý alymyna ıelik etýin toqtatý týraly tapsyrma berdi.