Advokat kórsetetin zań kómegine aqy tóleý bıýdjet qarajaty esebinen júzege asady - B. Imashev

ASTANA. 20 aqpan. QazAqparat - Búgin Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine memlekettiń kepildik bergen zań kómegin usynýy júıesin jetildirý máseleleri boıynsha ózgerister men tolyqtyrýlar engizý týraly»

zań jobasy birinshi oqylymda maquldandy. Atalǵan qujat respýblıkalyq bıýdjet qarajaty esebinen zań kómegin kórsetý júıesin jetildirý úshin Qazaqstan Respýblıkasynyń birqatar zańnamalyq aktilerine ózgerister men tolyqtyrýlar engizýdi kózdeıdi.

Atap aıtqanda, zań jobasynda Qylmystyq is júrgizý, Azamattyq is júrgizý kodeksterine, Ákimshilik quqyq buzýshylyq týraly QR Kodeksine, Advokattyq qyzmet týraly zańǵa ózgerister men tolyqtyrýlar engizý kózdelgen.

«Tegin zań kómeginiń ýaqytyly kórsetilýin qamtamasyz etý maqsatynda Kodekstiń 71-babynda qylmystyq isti júrgizýshi organnyń bir táýlik ishinde oryndalýǵa tıis qorǵaýshymen qamtamasyz etý týraly qaýlyny aýmaqtyq advokattar alqasyna jiberýi týraly ereje bekitilgen. Kodekstiń 72-babynda qylmystyq isti júrgizýshi organnyń uzaq merzim ishinde buryn tańdap alynǵan nemese taǵaıyndalǵan qorǵaýshynyń qatysýy múmkin bolmaǵan jaǵdaıda ony advokattar alqasy arqyly aýystyrý quqyǵyn mindetke ózgertý usynylady. Osydan basqa, memleket kepildik bergen zań kómegi júıesine qatysýshy advokattarǵa eńbekaqy tóleý boıynsha Úkimet quzyreti bekitilgen erejemen Kodekstiń 80-baby tolyqtyrylady», - deıdi Ádilet mınıstri Berik Imashev.

Budan bólek, «Advokattyq qyzmet týraly» zańǵa birqatar ózgerister engiziledi. Atap aıtqanda, advokat kórsetetin zań kómegine aqy tóleý bıýdjet qarajaty esebinen júzege asyrylatyny naqty qamtylady.